Monday, August 17, 2015

BLESSING TI DUA A BARO A TRAKTORA, NAARAMID

Cabugao, Ilocos Sur – Kalpasan ti Flag Raising  Ceremony, naangay ti B lessing  ti dua a baro a traktora nga inparuar ti DA-RFO 1 (HVCDP)  a para kadagiti Asosasion ti Cabugao Vegetable Producers and Traders Association ken iti Reppa-ac Vegetable Growers Association iti Agosto 17, 2015  a no sadino a ditoy ket dinar-ayan dagiti Opisiales ti ili, umili ti Cabugao ken ti  Pamilia-LGU nga indauluan da Mayor Edgardo “Ediboy” S. Cobangbang, Jr. ken ni Vice Mayor DJ Savellano. 


Impeksa ni  Mayor Edgardo “Ediboy” S. Cobangbang, Jr. iti naan-anay a ragsak ken  panagyamanna kadaytoy a nagun-od a proyekto  ta naipakita dagitoy nga asosasion a kinabaelanda nga imbaklay ti counterpart-da nupay pannakayendorso ti binagi ti Munisipio iti pannakagun-od dagitoy a makinaria iti DA-Regional Field Office  1. Pinagyamanan pay ti Ama ti Ili iti panangbendision dagitoy a ramit babaen ken  ni Rev. Fr. Felix Costales. Kimmablaaw ken nagyaman iti amin a timmabuno iti daytoy a  seremonia. Dinakamat latta ti Ama ti Ili iti napintas nga ibunga ti nasayaat nga intension babaen iti  napudno a serbisio ket di agressat ti maisangpet a proyekto a pakakitaan nga ammoda a tuntonen ti kaikarianda a serbisio kadagiti mayataday nga Ahensia a kas iti DA.


Innayon ni Mayor Ediboy nga aywananda dayta a galadda ken  prinsipio a nasursuroda iti panangtarabay kadakuada ti Munisipio ket no kastoy ti pagbanagan dagiti Asosasion ket adunto latta ti mapasangpet a proyekto a pagsayaatan dagiti umili ti Cabugao nangruna iti Sektor-Agrikultura.

Iti nasao a Blessing Ceremony, nagatendar ti sibubukel a kameng ti Konseho Munisipal nga idauluan ni Vice Mayor DJ Savellano; Ms. Elsa V. Rafanan, HVCDP Provincial Coordinator; Mrs. Ester P. Aguimbag, Municipal HVCDP Coordinator; OIC Municipal Agriculturist Robert S. Savella; MAFC Chairman Rogelio Barlolong; Mr. Armando Azcueta, Presidente ti Cabugao Vegetable Producers and Traders Association ken dagiti Opisiales ken Miembros ti Reppa-ac Vegetable Growers Association; Miss Edith Castillo; Barangay Officials nga idauluan ni ABC President Thaddeus “Teddy” U. Soller ken ti Pamilia-LGU iti pannakaimatang iti pannakabendision dagitoy dua a baro a traktora. # (Web In-Action) 

No comments:

Post a Comment