Cabugao, Ilocos Sur – Tallo a pannakabagi ti DA-Philippine Carabao Center, a nakabase iti Mariano Marcos State University, Batac City, Ilocos Norte nga indauluan ni Grace Marjorie R. Recta ti nagsadia iti opisina ti DA-LGU ket kinasaritada ni Livestock and Meat Inspector Dr. Melvin Castro, DVM tapno makikoordinarda maipapan iti pannakaiyam-ammo kadagiti programa ti PCC a mangted ti pagsayaatan dagiti mannalon no maadaptarda dagitoy a panagpatanor ti nangato ti kalidadna a nuang: “water buffalo”.
Kalpasan ti ababa a panagpapatang, napagkaykaysaanda ti nagturong iti opisina ken nagpakaammoda ken ni Mayor Edgardo “Ediboy” S. Cobangbang, Jr. a nangawat met ken nangpasangbay kadakuada.
Kangrunaan a panggep daytoy a sanga ti Departamento ti Agrikultura (DA) ket iti pannakaiyam-ammo ti programa a panangpatan-ay ti nakalidad a klase ti nuang a pang-karne ken magatasan.
 |
| Kinagrupo ni Mayor Ediboy iti uneg ti opisinana dagiti pannakabagi ti Philippine Carabao Center (PCC), MMSU, Batac City kasta met ken ni Dr. Melvin Castro, Livestock and Meat Inspector |
Segun iti Carabao Development Program, kabaelan ti Ahensia nga alay-ayan ti kinapanglaw, mangted seguridad ti taraon, mangpasayaat ti nutrision, mangpataud ti pagtrabahuan, ken pannakausar a nainsiriban dagiti rekursos a di maus-usar a mainaig itoy.
Ti “Artificial Insemination” wenno pannakaiyallatiw iti aanakan ti babai a nuang ti semen nga aggapu iti superior a toro a mangputot kadaytoy tapno umadu ti pulina a maiduma ti klaseda iti gagangay a nuang.
Sumarsaruno a maipatungpal dagiti dadduma pay a teknikal a wagas ken tulong ti Ahensia iti mannalon a maseknan tapno naan-anay ti panagballigi ti programa.
Ti Philippine Carabao Center ket maysa nga Attached Agency ti DA ken nabuangay babaen ti RA 7307, a maaw-awagan ti Philippine Carabao Act of 1992. # (Web Research)
 |
| Dagiti pannakabagi ti PCC kabayatan a kapatang ida ni Dr. Melvin Castro, DMD: Grace Marjorie R. Recta, Riczon B. Callema, Technician ken William A. Gudoy |
 |
| Ni Grace Marjorie R. Recta ti Philippine Carabao Center |
No comments:
Post a Comment