Thursday, December 1, 2011

NOBIEMBRE 30, MAIKA-148 A TAWEN NI ANDRES BONIFACIO: PANAGPIESTA TI BRGY. BONIFACIO

Cabugao, Ilocos Sur (Nobiembre 26-30, 2011) – Ita a tawen, selebraran dagiti opisiales ken lumugar ti Brgy. Bonifacio, Cabugao, Ilocos Sur ti aldaw a panagpiestada a kas pammadayaw  ken  kanaganan   ni Andres De Castro  Bonifacio, maysa a Bannuar a Pilipino a nakaipanaganan ti Barangay.
Idi Nobiembre 26, 2011, naaramid ti Battle of the Band a nagpartisiparan dagiti  banda a kangrunaan a naggapu iti Umuna a Distrito ti Probinsia ti  Ilocos Sur a nangyawidan dagiti napagasatan  a nangabak ti dadakkel premio.
Iti sumuno nga aldaw, Nobiembre 27, naangay ti Bingo Bonanza iti Plasa ti Barangay a nangparagsak kadayta nga aldaw. Panagsagana ti Bumarangay iti Nobiembre 28 ken pannakaaramid ti Parada iti malem ti Nobiembre 29 a pangpadaeg ti pannakapili ni Reyna  Micaela Cassandra 1 a mangituray ti Panagpiesta ti Barangay.   
  
Iti panagpiesta ti Barangay Bonifacio
Kabigatanna, Nobiembre 30,  naaramid dagiti aktibidades a kas  ti Diana iti aglikmut ti Barangay, panagidaton dagiti lumugar ken sangsangaili  ti sabsabong iti Monumento ni Bonifacio, naaramid ti libre a panagpapukis dagiti pada a lampong iti kaaldawan ti anibersario ti Bannuar idiay asideg ti Barangay Hall, simmaruno ti  Nasantuan a Misa, sa naasikaso ti naisagana a napagsasanguan iti pangngaldaw

Monumento ni Maingel, Andres Bonifacio (“nakalayat!”  ti birngasna) a nagsaad iti rusok ti Poblasion ti ili a Cabugao
 
SANGKAPIRGIS  A TALDIAP-NAPALABAS TI BIAG TI BANNUAR 

Natingra ti lagip dagiti umili a Filipino kadaytoy naindaklan a bannuar a nupay nayanak ken timman-ay iti Kamanilaan, inid-idolo dagiti umili iti inyuritna a pakasaritaan iti Historia ti Pilipinas babaen ti panangyusuatna iti  rebolusion kontra iti rehimen-Kastila tapno maruk-atan ti Pagilian iti pannakatagabo ken pannakaadipen a kenkuana a  di maiparbeng iti sibilisado a kagimongan.

Nupay kinaykayat ni Andres Bonifacio nga iyusuat ti panagbalbaliw babaen iti buli ken tadem, kasta met  laeng ti katadem ken katarumamis ti panagut-utek ni Dr. Jose P. Rizal a kinaynayatna a maiwayat ti panagbalbaliw babaen iti tadem ti pluma ken panagirakurak. Dua a senario a mangipalgak ti rimat a paltuaden ken ibunga ti nairut a panagkaykaysa.

Kineltay man ti saan a nasesita a risiris ti biag ni Bonifacio, dakkel ti naibinglayna nga apag iti pannakamuli ti napintas a nagbambanagan ni Pilipino iti sab-ok ti nademokrasiaan a panagbiag. Kinapudnona, ni Bonifacio ti dinutokan ni Revolutionary President Emilio F. Aguinaldo nga umuna ken apagbiit  a Sekretario ti Departamento ti Interior, segun iti DILG Primer.

Nupay kasta,  idi 1935, pinadayawan dagiti lumugar ti Barangay Bonifacio, Cabugao, Ilocos Sur babaen iti pannakaaramid ti naisangsangayan  monumento ni Andres Bonifacio iti sungaban ti ili iti Kalsada Nasional ken batog ti daan a nagsaadan ti Merkado Publiko (maaw-awagan ti CRISER MARKET gapu ta indonar daydi Don Crispin Serrano ti nalawa a lote a pammadayaw kenkuana ken iti lagipna) ken disso ti Cabugao Central Park (CCP) itan.

Buya ti Cabugao Central Park (CCP) iti agdama   a masarakan iti dumna ti Highway a parte ti Barangay Bonifacio ken  nagsaadan idi ti daan a tiendaan nga indonar daydi Don Crispin Serrano ti lotena
Nabuangay ti Barangay Bonifacio iti salinong ti Akta Republika 3590 ket naangay ti umuna nga eleksion ti Konseho ti Barangay iti umuna a Lunes ti 1960. Ni Abogado Ernesto Somera ti immuna a naelektaran a Barangay Captain ti Barangay Bonifacio.

Masarakan ti Barangay Bonifacio iti umuna a barangay ti poblasion a matuparmo no aggapuka iti Manila. Sakbay ti poblasion, maitangkarang ti agkakadaeg a nitso ti Cabugao Municipal Cemetery, ti pasdek ti Cabugao Institute ti amianan ti Kalsada Nasional ken Cabugao South Central School iti abagatan ti National Highway.

Ti Cabugao Institute, maysa a kadaanan a pageskuelaan-sekundaria iti amianan ken masarakan igid ti hi-way ti Barangay Bonifacio
Addaan met ti Barangay Bonifacio iti innem (6) a Purok: Barangubong – masarakan iti amianan ti Kalsada Nasional ket ditoy nga agnanaed dagiti naparaburan ti talugadingna ti musika ken kamkameng ti banda ken musiko ti ili; Nagtupakan – pagnaedan dagiti lumugar iti abagatan ti haywey no aggapu iti Manila; Pagpartian – maysa idi a dissso ti daan a tiendaan a pagpartianda kadagiti ayup wenno masasao nga slaughterhouse; Timmagipuro-mayarig iti maysa nga isla iti amianan ti Barangubong ta daytoy ket linikmut ti dua a waig a nangipusing daytoy iti kadarapatna a purok idi un-unana a panawen ngem makaballasiw itan dagiti lumugar gapu ta narangtayanen dagiti waig; Abagatan – masarakan met iti abagatan ti National Highway; Centro-amianan ti dati a tiendaan ket ditoy a masarakan ti adu a kabalbalayan ket napanaganan pay ti “TENGNGA”.

Ditoy Barangay Bonifacio ti pakasarakan ti historikal a Cabugao Institute, maysa a kaunaan a pageskuelaan-sekundaria iti amianan ta naipasdek idi Pebrero 1927 ket ditoy a namuli ken napatanor dagiti nagbalin a prominente a tattao iti benneg ti politika, medisina, inhenieria ken dadduma pay a mapagtamdan a propesion iti nadumaduma a tay-ak ti pagsiriban.

Ti napabaro a pasdek ti Cabugao South Central School a masakupan ti Brgy. Bonifacio
Naisaad pay ditoy ti Cabugao South Central School a pakasarakan kadagiti kadaanan a pasdek a mangipasimudaag ti kabayagnan a pageskuelaan iti ili.

Naipasdek met dagiti nadumaduma a pasdek-negosio ti agsumbangir a paset ti Kalsada Nasional ket namuntaran metten iti amianan t i Kalsada Nasional ti agkakadaeg ken moderno ti pannakaaramidna a balbalay a mangipalnaad ti narang-ay a kasasaad ti panagbiag dagiti akimbalay.

Ti Barangay Bonifacio ket addaan iti P972,525.00  nga Internal Revenue Allotment wenno IRA  a naidagup iti P1,076,525.00 nga Annual Budget ti CY  2011.

Addaan ti Barangay Bonifacio iti P194,505.00 a 20% Development Fund ket maigastos kadagitoy sumaganad: Clean and Green; Solid Waste Management; Re-gravelling of two roads; Maintenance of Brgy. Nursery and Library; Electrification; ken  Creek Maintenance. 

Adaaan ti Konseho ti Barangay iti kabukbukodan a lote iti amianan ti Kalsada Nasional a nakaipasdekan ti Barangay Hall a pagopisinaan ti Sangguniang Barangay, Day Care Center, Chapel, Basketball Court ken nalawa a pavement. Naulimek daytoy a disso ta naisaad iti asideg ti tinaltalonan nga adayo ti kabalbalayan.

Pakabuklan ti Barangay Hall ti Barangay Bonifacio
PAMMADAYAW A NAGUN-OD TI BARANGAY BONIFACIO

Napadayawan ti Barangay Bonifacio a Best in  Barangay Nutrition Programs Implementer ti Provincial Government Level idi tawen 2009 kasta met a nagun-od ni BNS Macrina I. Saturno ti 1st runner-up ti Outstasnding Barangay Nutrition Scholar, Provincial Level kadayta a tawen. 

Iti 2010, nagun-oden ni Macrina I. Saturno iti kina-Outstanding Barangay Nutrition Scholar ti Ilocos Sur ken maysa kadagiti SIGLAT Awardee kalpasan iti nainget nga evaluation. Nagun-od latta met ti Barangay Bonifacio ti Best  in Barangay Nutrition Programs Implementer. Naaramid ti evaluation nga insayangkat ti nagkammayet a grupo ti Municipal, Barangay ken Provincial Evaluators nga indauluan ni Hon. Ferdinand R. Concepcion, Provincial Social Welfare and Development Officer (PSWDO) ti Probinsia ti Ilocos Sur.

Imbatad ni Brgy. Captain Valentin S. Tuyor, Jr. a nagtitinnulongan daytoy ti kallabes nga administrasion ti Barangay Bonifacio kasta met iti agdama nga inna ririendaan ti pannakagun-od kadagiti pammadayaw a nangitag-ay ti Barangay Bonifacio maikomperar  kadagiti 32 a barbarangays a kinasalipna kadaytoy a benneg ti pagsasalisalan

Kidkiddawen ni Brgy. Captain Jun Tuyor kadagiti kakalugaranna ti agtultuloy a panagtutunosda agraman kadagiti amin nga opisiales ti Barangay a mangpasayaat ken mangpapintas pay ti Barangayda ken agyaman met iti agdama nga Administrasion nga idauluan ni Mayor Edgardo  “Ediboy”  S. Cobangbang, Jr. ken iti babaen daytoy kadagiti suporta ken pannarabay nga impaayda kadagiti Opisiales a maysa a kapatgan a nangtulong kadagitoy a balligi nga inda natun-oyan. 
 
Indauluan ni Kapitan Valentin “Jun” Somera Tuyor, Jr. dagiti opisiales ti Barangay Bonifacio ken lumugar a nagparada idi Nobiembre 29, 2011
Ni Outgoing Queen Miss Bonifacio 2005 Miss Ma. Georgette Sajor a binayabay ni SK Chairman Arvin Jay Manauis
 
Iti karabiyan ti Nobiembre 30, 2011, naaramid ti coronation ceremonies kadagiti Reyna ken Prinsesa a nangitampok ti uppat nga aldaw a Piesta. Kalpasan ti intermission number ti Day Care, Brgy. Bonifacio, pinagsaganad a pinagsapata ni Mayor Ediboy, kangrunaan a nasangaili, dagiti opisiales ti Senior Citizen, Farmer’s Association, 4-H Club ken RIC, dagiti asosasion a masarakan iti Brgy. Bonifacio.
         
Kimmablaaw ken dinayaw ni Mayor Ediboy dagiti  napintas a naipabuya ken kinaadu ti nakipiesta. Kalikagumna a taginayonen koma dagiti lumugar ti kastoy a kinaurnos ken panagkaykaysada a nangirubuat ti aktibidad. Innayon ti Alkalde  a ti Brgy. Bonifacio ti maysa a kaunaan nga agpipiesta sakbay ti Piesta ti Ili ket namnamaenna a matulad met dagiti dadduma a barangay a sumaruno nga agpiesta ti inaramid ti Brgy. Bonifacio.
         
Makaparay-aw met ti impabuya ti lima a grupo a nagtitiponan ti ubbing, agtutubo ken babbaket a nangsala iti tallo a piesa ti musika. Napremiuan ti nangabak kalpasanna.


Adu met insagana ti Konseho ti Barangay a papremio. Naaramid pay ti Raffle Draw kadagiti naisagana a sagut. Paset ti nagbunotanda ti numero iti umuna a 100 a naibunong a numero. Naragsak a napan nangawat ti premio dagiti nabunot ti numeroda.
Nasangaili, nagited ti Sash, Bouquet, Trophy ken Korona  kadayta a rabii da Vice Mayor Danny Q. Gazmen, ABC President, Rizal Brgy. Captain & Mrs. Teddy U. Soller, SBM & Mrs. Richard T.  Alcid, SBM Vicky S. Serna, SBM, Dr. Carlito S. Pano, SBM Josefina S.  Vallejo, Atty. Aimee C. Somera. Adda met nakiragragsak a   Balikbayans  ken  nagramut ti Barangay Bonifacio nga agnanaed  iti sabali a luglugar.
         
Da Mayor Ediboy ken ni Atty. Aimee C. Somera ti nangisaad ti Korona  ni Reyna Micaela Cassandra 1st.   # (Insurat ni JOED S. SAJONIA/Photographed  by Kevin Somera)
         
Dagiti nangituray ti Panagpiesta ti Brgy. Bonifacio ita a tawen 2011 ket dagiti sumaganad:
         
HER MAJESTY QUEEN 1ST
MICAELA CASSANDRA SOL
MISS SAGRADA FAMILIA
KATELEEN YANNA MARIE SOMERA
MISS PERPETUAL HELP
JESSA MAE SALAMANCA
MISS SAINT JUDE
HAZEL M. JULARBAL
MISS VISITACION
EANNA MARIZ VALLEJO
      
Indauluan met ti SEGUBAN ENTERPRISES a kukua da Apo  Jeremy Seguban, Sr. ken Mrs. Juliet A. Seguban kasta met ti baroda a ni Mr. Jeremy, Jr. dagiti kakaduada a  nangesponsor kadagiti kasapulan dagiti  aktibidades a nangparagsak iti uppat nga aldaw a panangpiesta ti Barangay Bonifacio, Cabugao, Ilocos Sur. # (Web Team)


No comments:

Post a Comment