UNP STUDENT’S HANDOG PAMASKO 2011

Cabugao, Ilocos Sur - Insayangkat dagiti estudiante ken mangisursuro iti University of Northern Philippines (UNP), Vigan City iti Handog Pamasko 2011 idi Disiembre 17, 2011  ket napilida ti Barangay Dardarat, Cabugao, Ilocos Sur a nakaaramidan ti panagibunongda ti regalo.
“Napili ti Barangay Dardarat maibasar iti rekomendasion dagiti lideres ti estudiante,” imbatad ni Professor Mariano F. Avila, Dean of Student Affairs (OSA)  ti UNP. 

“Naprogreso ti ili a Cabugao. Mariknami  pay  ti ayat ken kinamanagsangailiyo. Naalibtak dagiti peacekeepers. I am very proud ta agpadakami ken Mayor Ediboy a naggapu iti Seminario. Dayawtayo amin ti nagun-oden ti Cabugao,” innayon pay ni Prof. Avila a taga-Vigan City .

Naaramid ti programa iti Dardarat Pavilion ket naiballet  ti paay-ayam a nagpartisiparan dagiti ubbing a nakagun-odanda ti premio    ken Raffle Draw a nakaitedan ti gunggona dagiti mabunot ti numerona,   kadagiti panagsarita nga inyebkas dagiti speakers iti imatang dagiti bumarangay ken opisiales nga idauluan ni Brgy. Captain  Danny Garcia.

“Ita laeng a mapasamak ti kastoy kalpasan ti 13 years,” kuna ti maysa a dadaulo ti delegasion ken ni Mayor Ediboy iti pannakitaripnong ti Ama ti Ili kadagiti taga-UNP ken taga-Dardarat.

Natiliw ti imatang dagiti sangaili iti napintek ti panagtan-ayna a mangrove plants iti aplaya ti barangay ket agdisnudoda met a makipaset iti panagmula kas ambagda a tignay   iti panangsalbarda iti kadilian dagiti coastal barangays.

Napnuan rag-o ken pannakiinniliw ni Mayor Edgardo “Ediboy” S. Cobangbang, Jr. kadagiti bimmisita nga student leaders ken professors iti UNP iti Barangay Dardarat. Impeksana ti panagyamanna kadagiti naruay a pannakaapresiar a naibagada  iti kasasaad ti barangay ken ili kasta met iti kabara ti panagsangaili dagiti kailianna  kadagiti bisita  iti  dayta a pagteng.

“Adu  ti naam-ammok a  kabagiak ditoy, kuya,” imbaga met ni Marvin Miller Garcia, Presidente ti UNP-Student Council a taga-San Emilio, Ilocos Sur. “Very  hospitable ken aktibo dagiti barangay officials ken tanod. Agyamankami met  ken ni Mayor Ediboy Cobangbang, Jr.”

Naragsak dagiti bumarangay a tinarabay ni Kapitan Danny Garcia a nangawat ti napateg nga aginaldoda kadagiti ala-Santa Klaus a bisita.

“Ti kinaurnos ken kinatalnatayo  nga impakitatayo  ket makaanay met siguron  a pangsubadtayo ti ayatda a nangted ti sagsagut,´impeksa met ni Kapitan Danny Garcia. “Agyamankami met ken ni Mayor Ediboy ta adda latta a kadinnanggaymi ken   kadwami a makiinnabrasa  kadagiti umay a sangaili ti barangaymi.”

Nagpaay nga emcee ti programa da Jerimie Rillamas ken Lovely Anne Joy Lazo ti UNP Vigan City.
Ti University of Northern Philippines (UNP), Vigan City  ket idauluan iti agdama ni Dr. Gilbert Arce, Ph. D. # (Rinetrato ken insurat ni JOED S. SAJONIA)