Tuesday, December 13, 2011

2011 EDUCATION WEEK CELEBRATION, SINELEBRARAN TI CABPUSTERA

Cabugao, Ilocos Sur – Sinelebraran ti Cabugao Public School Teachers Employees and Retirees Association (CABPUSTERA) ti 2011 Education Week Celebration nga addaan ti tema: “K to 12 Basic Education Program:  PATULOY SA TAPAT NA  PAGBABAGO AT PAG-UNLAD” idi Disiembre 5-9, 2011 iti Cabugao South Central School, Brgy. Bonifacio, Cabugao, Ilocos Sur.

Sagudayen ti DepEd Memorandum 263, Series 2011,  maobligar amin nga opisiales ken mangisursuro kadagiti   pageskuelaan  ti sekundaria ken elementaria agraman ti pribado a sektor, opisina babaen ti Ahensia ken organisasion  a nakasalinong iti pageskuelaan a kas iti Supreme Student Governments ken  Supreme Pupil Governments.

Naipalaon pay  iti nasao a Memorandum dagiti posible a mabalin nga ipatungpal nga aktibidades tapno matungpal daytoy a pammilin ni DepEd Secretary Bro. Armin A. Luistro FSC. 

Iti biang ti DepEd Cabugao, nagtataripnong dagiti mangbukel ti CABPUSTERA idi Disiembre 9, 2011 agraman dagiti ubbing ket naaramid ti “RUN FOR EDUCATION” ken nagitedda ti nasapa a Pamaskua kadagiti maibilang  nga adda iti nababa nga  agpang  a pamilia  iti uppat a barangay ti Munisipalidad ti Cabugao.

Dagiti nailanad a gandat ti K to 12 Basic Education:
  • Maipaawat ti akem ti Edukasion a mangmuli/mangtubay  kadagiti ubbing/agtutubo nga agbalin a produktibo nga umili ken mapataranda ti panagbalbaliw ti panawen.
  • Suportaranna ti pannakaipatungpal ti K to 12 Basic Education Program.
  • Panagkakammayet dagiti maseknan/agipatungpal kas iti agad-adal,  mangisursuro, opisiales ti Ahensia ken LGU’s tapno maragpat ti nakalidad ken umisu nga Edukasion.
  • Manginspirar kadagiti Edukador nga agtignay iti pannakaidur-as daytoy a panggep tapno pumintas ti masakbayan dagiti agtutubo.
Iti ababa a pannao, manayonan ti dua a tawen ti panagbasa ti ubbing/agtutubo: Grade 7 ti Elementaria  ken 5th Year ti Sekundaria.

Imbatad ni Mrs. Helen V. Siruno, Supervisor, Office of the Public Schools,  DepEd District Cabugao a determinado  ti Gobierno Nasional a mangipatungpal kadaytoy a programa agsipud ta ti laengen Pilipinas ti sumagmamano a Nasion ti lubong  a di nangyimplimentar ti pannakanayon ti tawen a panagadal ti ubbing ken agtutubo.

Nupay kasta, ti Sektor ti Edukasion ket maysa kadagiti prayoridad nga ipamaysa a tultulongan ita ti  Gobierno Munisipal babaen iti liderato ni Mayor Edgardo “Ediboy” S. Cobangbang, Jr. iti Munisipalidad ti Cabugao. # (Web Research)

No comments:

Post a Comment