Wednesday, December 21, 2011

TI KAIPAPANAN TI STAC KEN PANAGSELEBRAR TI PASKUA 2011

Cabugao, Ilocos Sur – Nagselebrar dagiti mangimatmaton ken kliente nga ubbing  ti The Stimulation and Therapeutic Activity Center (STAC), institusion a pakaisuruan dagiti ubbing nga addaan ti nakayanakan nga an-annayen idi Disiembre 19, 2011 iti mismo a pasdek ti STAC, CNCS Compound, Barangay Bonifacio, Cabugao, Ilocos Sur. 

Ti STAC ket  nagkammayet nga indur-as/imbuangay  ti Katipunan ng Maykapansanan sa Pilipinas, Inc. (KAMPI) ken ti Danish Society of Polio and Accidents Victim (PTU) manipud  idiay pagilian a Denmark.
Nasangaili iti selebrasion dagiti opisiales ti Gobierno Munisipal nga idauluan ni   Mayor Edgardo “Ediboy” S. Cobangbang, Jr. a nangted ti mensahe ken nangiyawat kadagiti Pamaskua a sagsagut  para kadagiti agad-adal nga ubbing (Children with Disablilities-CWD’s). Kadua ni Mayor Ediboy da SB Members Dr. Carlito S. Pano, Chairman, Committee on Social Services ken Dr. Jemaima Tan-Yee, Committee on Social Services kasta met ni Mrs. Lydia S. Gazmen, Municipal Social Welfare Development Officer ti DSWD-MSWDO, LGU-Cabugao.

Pinagsapata pay ni Mayor Ediboy dagiti opisiales ti STAC Parents Association a katinnulong dagiti STAC Staff a mangitandudo ti pagdur-asan ti institusion. Maysa kadagiti proyektoda para iti livelihood assistance ket ti Buri Weaving nga isursurto  ita ti dua a kameng a naibaon a nagseminar idiay San Juan, Ilocos Sur.

Kimmablaaw ken nagyaman ti Alkalde ti Ili  iti regta dagiti mangtartarawidwid ti STAC a kas maysa a mapangnamnamaan a sanga ti LGU iti agdama a mangtaming ti pakaseknan ken  iti serbisio para  kadagiti addaan ti an-annayen nga ubbing a maikkan ti umisu a  pannakaisagana nga agadal para iti normal a wagas ti pannakaedukar.

Maysa a kangrunaan a panggep ti STAC, segun pay  ken ni Ms. Jane Fernando, National STAC President, ket iti pannakaiyasideg dagiti ubbing  iti normal a pagadalan (CSCS) iti pasdek a pakaaturanda  tapno in-inut a mayadaptar  ken dida maikawkawa  iti kasasaadda nga  umagpangto iti pormal nga edukasion ti elementaria.

Nabangon ti pasdek ti STAC iti compound ti Cabugao South Central School ken tultulongan ti LGU-Cabugao iti agdama iti operasion ken pannakamantener ti nasao a pagadalan.

Agtallon a tawen (Marso 2008)  ti STAC  manipud naipasdek ditoy ili a Cabugao, Ilocos Sur.  Maibilang  kadagiti satellites ti STAC ti Candon City,  Sta. Maria, Vigan City, Sto. Domingo, ken Cabugao. Adda 118  nga ubbing (0-14 ages)  nga agad-adal iti STAC-Cabugao iti agdama, segun ken ni Ms. Jocelyn Tabboga, Social Worker. Innayonna nga inaldaw ti panag-duty-da nga staff ti STAC idinto a mamindua iti makalawas a mayeskediul ti session dagiti agad-adal. Medical Certificate ken Birth Certificate dagiti kangrunaan a papeles a maisubmiter iti asinoman  nga ubbing a maikalikagum a maipastrek nga agadal iti salinong ti STAC-Cabugao.

Maituloy ti Gift Giving ken Feeding kadagiti agad-adal inton Disiembre 28, 2011 nga esponsoran ti Konseho ti Barangay Bonifacio nga idauluan ni Brgy. Captain Valentin S. Tuyor, Jr. # (Web Research) 

 
 
 

No comments:

Post a Comment