Cabugao, Ilocos Sur - Iti panagrekurida ti Web In-Action iti Cabugao-Dayo idi Disiembre 11, 2011, nakauman-uman ti nagsurat ni Mr. Rizalino Sagun, akinkukua ti Sagun Cattle a taga-Brgy. Jordan, Sinait, Ilocos Sur.
“Nagbalinen a paset ti pagbiagan ti kaamaanmi ti kastoy a pagsapulan, Brother,” inlatakna. “No tutuosem, adu ti matulonganna ti Dayo ta adda met kitaen dagiti makipaset kas koma iti kuridor-adda met pamiliada.”
Nupay kasta, inamin ni Pari Rizalino a kadawyan laengen kenkuana ti maganansia ti panaglakona ti ayup. Napatpateg kenkuana ken kalikagumanna ti tumulong a mangparang-ay ti Dayo babaen ti regular a panagatendarda nupay no dadduma ket nakirang ti malakuan. Gapu ta daytoy ti dadduma a pagsapulanda, kayatna a mataginayon ti Dayo. Iti agdama, kas pangrugian, saan a ti mapalsot nga ayup ti pagrukodan kenkuana ti balligi ti Dayo no di ket iti pannakamantener ken regular nga operasionna ta di met mailaksid daytoy a paset ti Agrikultura a kangrunaan a pagbiagan pay laeng dagiti umili.
Regular latta met ti pannakitinnarabay dagiti opisiales ti Cabugao Livestock Traders Association nga idauluan ni Mr. Marciano Raciles, kasta met ti barbarangay nga idauluan ni ABC President, Rizal Brgy. Captain Teddy U. Soller. Segun ken ni Presidente Raciles, ipamaysada ken ipatungpalda dagiti plano a mangpadur-as ti Dayo ket kalpasanna amirisenda dagiti pagpigsaan ti pannakaiturong ti Dayo a daytoy ti sansanen ken nayonanda pay nga aramiden.
Mangnamnamada nga agballigi ti pagbanagan ti Dayo iti namunganay a pannakitinnulong/pannakitinnarabay ti Gobierno Munisipal babaen ti liderato ni Mayor Edgardo “Ediboy” S. Cobangbang, Jr. ken ti Gobierno Probinsial babaen kada Governor Luis “Chavit” Singson ken Vice Governor DV Savellano. # (Web Research)
 |
| Da Julio I. Medrano ti Brgy. Baracbac ken Rizalino Sagun, Brgy. Jordan, Sinait, Ilocos Sur, agpada a duma-Dayo ken akinkukua ti trakan nga um-umay ti kada-Sabado ditoy Cabugao |
No comments:
Post a Comment