PHILHEALTH CARDS TI 2ND BATCH A BENEPISIARIO, NAIBUNONG

Cabugao, Ilocos Sur – Umabot ti  833  nga umili ti Cabugao, Ilocos Sur ti immawat ti Philhealth Cards manipud iti Municipal Social Welfare and Development Office babaen ti panagibunong dagiti LGU Personnel iti  panangidaulo ni MSWD Officer Mrs. Lydia S. Gazmen idi Disiembre 21, 2011 iti pasdek ti SB-ABC Hall, Cabugao, Ilocos Sur.

Daytoy a gannuat ket paset ken mayataday iti maysa kadagiti  prayoridad  a  programa  ni Mayor Edgardo “Ediboy” S. Cobangbang, Jr. a  pannakatulong  ti sapasap   partikular iti serbisio-medikal a mangitunda ti nasayaat a salun-at dagiti umili tapno  kabaelanda   ti makipagbangon ti mas naprogprogreso pay nga ili ti Cabugao.

Ladawan ti pannakaiwaras dagiti Philhealth Cards kadagiti umili

Malaksid itoy, adda pay sumagmamano nga “indigents a pamilia” a mangnamnama a maikkan/makaala  ti Philhealth Cards babaen ti pannulong ti Gobierno Munisipal ken ti Barangay.

Maipalagip a naballigi ti direktiba ni Mayor Ediboy a pannakaliklik ti agsusukot a Philhealth Cards ti  sangkapamilia tapno agwaras   daytoy a benepisio ken  ad-adu ti matulonganna nga umili a maiparbeng unay a maikkan iti kastoy a pakapalag-anan ti panagbiag.

Iti sabali a bangir, paset pay laeng ti gannuat ti Goberno Munisipal a pannakatulong dagiti nababa ti kasasaadna a pamilia ti pannakaited ti tulong manipud iti Ilocos Surian Association of Hawaii (ISAH)  babaen ti liderato da Mr. Danny Villaruz ken Dr. Charlie Y. Sonido ti pannakaited ti tulong-pinansial  kadagiti 300 a pamilia manipud iti Brgys. Daclapan, Namruangan ken Sabang. Dagitoy a pamilia ket benepisiarioda pay iti 4 P’s (Pantawid Pamilyang Pilipino Program) nga imatonan ti DSWD-MSWDO. 

Inawat dagiti nailista a pamilia/pannakabagida   ti tulong manipud iti grupo dagiti taga-ISAH nga idauluan ni Mr. Danny Villaruz, Presidente iti imatang ni Mrs. Lydia S. Gazmen, MSWD Officer iti pasdek ti Senior Citizen’s Office, Barangay Hall Compound, Brgy. Rizal, Cabugao, Ilocos Sur.

Mangnamnama ti Gobierno Munisipal babaen ti liderato ni Mayor Ediboy a babaen ti panagkaykaysa dagiti umili a makikammayet iti LGU a mangprobitsar  ti tulong manipud iti programa ti Gobierno Nasional ken Probinsial kasta met iti Pribado a sektor, mapalag-anan dagiti umili a pakaisentruan ti serbisio.# (Web Research)