Thursday, December 22, 2011

GROUNDBREAKING CEREMONY TI LYING-IN CLINIC, NAILUNSAD

Cabugao, Ilocos Sur (Disiembre 23, 2011)  – Naaramid ti groundbreaking ceremony ti Cabugao Rural Health Unit - Lying-in Center iti sango ti maar-aramid a pasdek ti nasao a pakatamingan dagiti inna a masikog ken aganak ken  tinalantanan dagiti opisiales ti Gobierno Munisipal nga idauluan ni Mayor Edgardo “Ediboy” S. Cobangbang, Jr. ken opisiales ti Barangay nga idauluan ni ABC President, Rizal Barangay Captain Teddy U. Soller idi Disiembre 21, 2011.

Kimmablaaw ken nagyaman ni Mayor Ediboy iti pamilia ni Dr. Charlie Y. Sonido a  pakaibilangan da Mr. Nelson Sonido, Mrs. Aurora Sonido ken  Mrs. Chona A.  Montesines-Sonido manipud  iti Estado ti Hawaii, USA nga adda iti grupo dagitoy  iti ili a Cabugao gapu iti maisayangkat a Medical Mission kadagiti umili. Impeksa ni Mayor Ediboy a ti pannakaited daytoy a proyekto ket manayon a pakalaglagipan iti kinamanagayat ken kinamannikitinnulong ti pamilia da Dr. Charlie Y. Sonido a nagtaud iti Barangay Cuantacla, Cabugao Ilocos Sur ket impaganetget pay  ti Mayor kadagiti agserserbi iti LGU-Cabugao  ti naimpapusuan, napudno ken awan panangidumdumana a panagserbi iti amin a kailian ti Cabugao.  Nairagup met iti nasao a pasamak  ni  Mr. Danny Villaruz, Presidente ken kakaduana nga opisial   ti Ilocos Surian Association of Hawaii (ISAH).


Nagyaman met ni Dr. Sonido ken ni Mayor Ediboy  ken dagiti opisiales ti Gobierno Munisipal ken amin a nakipaset iti nasao a seremonia. Imbatad ti Doktor  ti pannakikammayetna  iti liderato ni Mayor Ediboy nga umallawat kadagiti amin a proyekto nga ipatungpalda a kailianda iti abroad iti ili a Cabugao. 


“I trust and believe in him,” paset ti panagsarita ni Dr. Charlie Y. Sonido  maipapan iti liderato ni Mayor Ediboy. Nupay kasta, linagipna met dagiti maipada a pannakinamingna kadagiti napalabas nga administrasion ti Gobierno Munisipal partikular  iti pannakailunsad ti Medical Mission ket siaayat ti pamiliana ken dagiti kakaduana iti Ilocos Surian Association of Hawaii  a mangidaton dagitoy a “humanitarian”   a tignay/aktibidades  kadagiti umili ti Cabugao.


Kalpasan ti panagsarita dagiti kangrunaan a mangawat ken mangted iti nasao a  proyekto, naiplastar  ti “time capsule”,  a nakaipasetan dagiti amin a maseknan nga opisiales ken pannakabagi dagiti agidonar a pamilia,  a nakaipalaonan ti resolusion ken plano ti maipatakder a lying-in clinic.


Iti seremonia, nagatendar met da Vice Mayor Danny Q. Gazmen, Dr. Rudy M. Singson, Municipal Health Officer, SBM Dr. Carlito S. Pano, Chairman, Committee on Health, SBM Vicky S. Serna, ken  SBM  Josefina S. Vallejo ken Kapitanes ti nadumaduma a barangay ti ili a Cabugao. 


Kalpasan  ti seremonia, nagturong dagiti  Opisiales ti Gobierno Munisipal nga idauluan ni Mayor Ediboy, kameng ti LGU-Offices, Barangay Officials,   nagatendar nga umili,  grupo dagiti sangaili   iti Cabugao Cultural and Sports Complex a pakaangayan ti Medical Mission. # (Insurat ni JOED S.  SAJONIA/ab photography)


No comments:

Post a Comment