Monday, December 12, 2011

ALTERNATIVE LEARNING SYSTEM (ALS-LSCS) TI DEP-ED, NAILUNSAD MANEN ITI ILI TI CABUGAO

Cabugao, Ilocos Sur - Nailunsad ti Alternative Learning System -Literacy Service Contracting Scheme (ALS-LSCS), programa ti Departamento ti Edukasion (DepEd) para iti sapasap a di nakaagpang ti adal ket maipatungpal/mairubuat  ita   iti Barangay Arnap, Cabugao, Ilocos Sur.

Naaramid ti programa a nangpasingked/panagrugi   ti panagadal ti 31 nga out-of-school youths a lumugar iti nasao a barangay iti Practical Electricity  babaen ti panangimaton ni Mr. Nestor de los Santos, Program Coordinator, Private Electricians ken adda pay  a katinnulongna da Mr. Warren Sumibcay ken Mr. Demy Peneyra, agpapada a Mangisursuro  ti DepEd Cabugao District idi malem ti Biernes, Disiembre 9, 2011 iti pageskuelaan ti Barangay Arnap.


Innayon ni Mr. De los Santos a kasapulan a makompleto ti agad-adal ti 200 oras a panagadal  sakbay a maited kenkuana ti Certificate of Completion ti Practical Electricity (Building Wiring).Maitarubak pay a saklawen daytoy a programa ti Accreditation and Equivalency System (A&E System) a mangpaturpos ti elementaria ken haiskul  ti  di nakapagtuloy nga umili  iti kallabes a tawtawen  maigapu iti nagkaadu a rason. 

Nagatendar dagiti pangulo (Principals, Head Teachers/Teacher-In-Charge) ti nadumaduma a pageskuelaan-elementaria iti Munisipalidad ti Cabugao babaen ti panangidaulo ni Mrs. Helen Ventura Siruno, OIC Supervisor ti Office of the Public Schools,  DepEd District Office, Cabugao.

Iti nasao nga okasion, naisangayan a naawis  ni Mayor Edgardo “Ediboy” S. Cobangbang, Jr. ken kinatakunaynay ni Arnap Brgy. Captain Teodoro Tabula ken kameng  ti Konsehona.

Ti panagsarita ni Mrs. Helen Ventura Siruno, OIC Supervisor ti Office of the Public Schools,  DepEd District Office, Cabugao
Imbinsabinsa  ni DepEd Supervisor Helen V.  Siruno ti pateg ti ALS-LSCS  para kadagiti saan a  nakagun-od ti nangato a  pormal nga adal ken mangpunas  ti illiteracy iti komunidad ken kagimongan. Nupay narugianen iti kallabes, ngem nagsardeng iti apagapaman   gapu ti kinakirang ti pundo.   
 
Ngem iti pannakabiag daytoy a programa iti agdama, nagyaman ti Superbisor iti suporta ti Gobierno Munisipal iti liderato ni Mayor Ediboy ti pannakaituloy daytoy a gannuat  ket   mangnamnama a babaen ti panangbitibit  ti LGU-Cabugao,  tinawenen a maipatungpal daytoy a programa tapno agsaknap iti dadduma pay a barangay a makasapul iti kastoy a serbisio.

Napnuan panangikalikagum ti panagsayaat ti kasasaad dagiti maseknan   ti anag ti Mensahe ni Mayor Ediboy kadagiti 31  nga agadal  ti Practical Electricity (Building Wiring) agsipud ta iti adal a magun-od dagitoy nga agtutubo ket ipanamnamana ti pannakapasayaat ti indibidual a kasasaadda no mayusarda ti inadalda.

Impaagsep ni Mayor Ediboy ti pateg ti sirmata ti Gobierno Munisipal a  pannakasuporta ti sektor ti Edukasion a pakairamanan ti kastoy a programa  agsipud  ta kenkuana  ti adal ket kangrunaan a sanggir    ti umili tapno kabaelanda nga  ited   ti tulongda a makipagbangon ti naprogreso a komunidad ken pagilian.


Nagyaman pay dagiti manarawidwid a mangisursuro iti Distrito ti  DepEd Cabugao  iti tulong ti Konseho ti Barangay nga idauluan ni Punong Barangay Teodoro Tabula iti pannakaorganisar daytoy a programa iti Barangay Arnap.    

Naiballaet met dagiti intermission number dagiti agad-adal nga ubbing a pakabuklan ti nadumaduma a parang ti sala ken Pamaskua nga ayug.

Immuna a nayam-ammo daytoy a programa idi 2006 babaen iti nagan a Non-Formal Education (NFE) ket iti manen Barangay Arnap, Cabugao, Ilocos Sur ti immuna   a  nakaipakatan daytoy a sistema ti edukasion tapno matulongan dagiti out-of-school youths (OSY)/dropouts  ket  kangrunaan a panggepna ti mangpunas  ti problema  ti illiteracy  iti kagimongan a Pilipino. # (Rinetrato ken insurat ni JOED S. SAJONIA)

Iti panagsarita ni Mayor Edibyo ti nasao a Launching Program
Intermission number dagiti agad-adal ti Arnap Elementary School

No comments:

Post a Comment