MAYSA NGA ALDAW A NAGSELEBRAR TI CABPUSTERA ITI PASKUA 2011

Cabugao, Ilocos Sur  – Insayangkat ti solido nga organisasion ti Cabugao Public Schools Teachers Employees and Retirees Association (CABPUSTERA) a buklen ti nakurang a dua gasut a kameng manipud iti nadumaduma a pageskuelaan ken barbarangay ti ili a Cabugao, Ilocos Sur nga idauluan ni Mrs. Estrellita M. Siruno  iti panangrambakda  ti Paskua 2011 iti pasdek  ti Cabugao Cultural and Sports Complex, Brgy. Rizal, Cabugao, Ilocos Sur.

Nasapada a nakarubuat ken simmangpet iti lugar  ti pag-Christmas Program and Party-anda ket naisalumina ti regtada/ganaygayda  a nagparehistro ken nagpipinnadamag sakbay a nairugi ti umuna a parte ti programada.

Immuna a nagmimitingda ket impamaysada a trinatar dagiti pakaseknanda ken programa ti asosasionda tapno mairingpas dagiti pangted ken marugian dagiti rebbengna a mairugi tapno sistematiko ti panagannayas dagiti aktibidadesda iti sumaruno a tawen 2012. Maaramid pay ti eleksion ti Hunta Direktiba ti asosasion.  Nataming  ti kasasaad ti Financial Statement ti asosasionda  a kas kangrunaan a pagsanggiran  ti asosasion kadagiti iwayatna a gannuat.

Naaramid ti Fraternal Luncheon kadakuada a miembros a  nakaidasaran dagiti naisagana ti tunggal kameng nga imetna nga umay makiprograma tapno maiparikna ti pannakapatibker ti panagkakadua, mapabaro ti linnangen ken mataginayon ti solidaridad  ti asosasionda.

Kalpasan ti pangaldaw, dimteng iti nasapsapa ni Mayor Edgardo”Ediboy” S. Cobangbang, Jr, a nangakem ti partena iti programa nga agmensahe. Kimmablaaw ken dinayawna ti kinatunos ti benneg dagiti Edukador a pundador ti natibker a kagimongan.Kinablaawanna pay dagiti nagretiro iti DepEd District. Kenkuana, napintas dagitoy nga ulidan ken makitkita dagiti sumarsaruno a henerasion tapno maitultuloy a maitag-ay ti Edukasion a kabinnulig ti Gobierno Lokal a mangpasayaat ti panangbangon ti mas  naprogreso pay  nga ili ti Cabugao.

Naituloy ti programa  ket nagsarita ni Mr. Edwin S. Savellano, Vice President, CABPUSTERA ken Chairman, Committee on Awards sa  naiyam-ammo, napadayawan ti gapuananda  ken naited dagiti Plake dagiti nagretiro iti 2011  nga isuda: Rudy S. Vallejo, Toribio C.  Artates, Jr., Lolita S. Tatson, Leonida M. Serrano, Constancia S. Sonido, Dinia S. Azcueta, Erlinda S. Guerrero ken Eufrocina N. Pante.

Naiballaet dagiti intermission number iti lima a Zona ti DepEd District ken dagiti Retirees. Naawis met nga agmensahe da Vice Mayor Danny Q. Gazmen ken  SBM Vicky S. Serna, Chairman, Committee on Education.

Nasangaili pay ken nangted met ti mensahe ni Dr. Estrella O. Soria, DepEd Assistant Schools Division Superintendent.  Nagpaay a Masters of Ceremonies da Fahd Agbulos ken Odette V. Somera.

Naragsak a nagisisina dagiti miembros nga imetda ti baro nga  espiritu ti panagkakadua, sirib,  ayat, ken panagkaykaysa a mangpasayaat pay iti sektorda ken iti komunidad a paggargarawanda. # (Web Research)