PRODUCTION LOAN ASSISTANCE, MAIPAAY KADAGITI MANNALON TI TABAKO

Cabugao, Ilocos Sur (Disiembre 15, 2011)  – Maysa a prayoridad a programa ti LGU-Cabugao ita a panagtatabako (2011-2012)  ket ti pannakapabulod kadagiti mannalon ti puonan iti panagmulada ti tabako. Kalikaguman ti Gobierno Munisipal babaen ti panangidaulo ni Mayor Edgardo “Ediboy” S. Cobangbang, Jr. ti pannakatulong kadagiti agmulmula ti tabako babaen iti pannakaipaay ti kasapulanda (inputs ken  mausar iti  land preparation) gapu iti akemda met a nakaigapuan ti mabingay ti Munisipio iti Tobacco Excise Tax a   pakabuklan ti RA 7171.

Kabayatanna, nasurok a sangasut a mannalon iti mabenepisiaran iti maisangrat  a tobacco production loan nga aggatad iti P1,000,000 (Counterparting Scheme: 50-50, LGU-Tobacco Trader) a nagun-od  iti Shyne Palay Buying Station a kukua ni Alvin S. Garcia iti Brgy. Lipit, Cabugao, Ilocos Sur manipud iti LGU-Cabugao.

Ni Alvin S. Garcia kabayatan a pirmaan ni Mrs. Zenaida S. Andrada, Municipal Agriculturist ti partena iti papeles para iti tobacco loan

Kasarsarita ni Mrs. Dionicia R. Seatriz, Municipal Technologist ni Apo Efren Garcia, ama ni Alvin nga agnegnegosio ti irik ken tabako iti unos ti 30-anios

Segun ken ni Mrs. Zenaida S. Andrada, Municipal Agriculturist, DA-LGU,  Cooperating Entity, napintas pay  ti credit performance ti nadakamat a trading firm iti panagiirik (Wet Season Crop 2011)  ket maitultuloy ti pannakigamuloda iti programa ti LGU iti Tobacco Season 2011-2012.

Babaen daytoy a wagas, manamnama nga usaren dagiti mannalon iti mayataday a teknolohia ti panagmula ti tabako nga inted ti NTA ken maipasigurado ti panagbayadda ti nabulodda a puonan agsipud ta mamonitorda  babaen kadagiti opisina ken ahensia a maseknan ken nakipinnirmada iti Memorandum of Agreement (MOA) sakbay nga inawatda ti binulodda.

Ti mabulod a kantidad ket maikkan ti 1% a gunggona iti las-ud ti innem a bulan nga ideal a kapaut ti panagtatabako.

Ti pannakaited iti umdas a puonan iti mannalon ti tabako ket manamnama a makapatanor ti nakalidad a napagango a bulong a mangitunda iti napintas a presio para ken ni Mannalon ti Tabako. # (Rinetrato ken insurat ni JOED S. SAJONIA)