Sunday, December 18, 2011

DAY CARE, NAGSELEBRARDA IDIAY BRGY. BACLIG TREE PARK

Cabugao, Ilocos Sur  – Pinili dagiti Day Care Teachers/Workers Association  ti ili a Cabugao ti nagselebrar iti salinong  ti kakaywan ti Brgy. Baclig Tree Park (nangabak iti kategoria a nakaisalipanna iti LAING CABUGAO 2011)  iti asideg ti Karayan Cabugao, Barangay Baclig, Cabugao, Ilocos Sur idi Disiembre 16, 2011.

Kinablaawan ken dinayaw ni Mayor Edgardo “Ediboy” S. Cobangbang, Jr., kangrunaan a sangaili,  ti panagkaykaysa/kinagaget  dagiti mangisursuro ti ub-ubbing a tumultulong a mangmuli ken mangtubay ti sumarsaruno a lideres ti ili iti masakbayan a panawen.

Impadamag ni Mayor Ediboy iti mapaspasangasangan a pannakaruk-at ti pannakaingato ti gunggona  ti Day Care Workers, pannakaited ti Teaching Materials ken pannakabangon ti Day Care School Building kadagiti awan pay pageskuelaanna ngem adda   ti Day Care-na   kas iti Barangay Maradodon ken Barangay Bato. Inulit pay ni Mayor Ediboy nga impadamag ti pannakagatang ti Municipal Service Bus ti LGU a mausar kadagiti aktibidades dagiti asosasion ken kaarngina a serbisio a pakasapulan dagiti umili.

Nagyaman met dagiti Day Care Workers ken ni Mayor Ediboy   nga idauluan ni Mr. Rudy Ilar, Presidente kasta met ni MSWD Officer, Mrs. Lydia S. Gazmen a nakidinnanggay iti naaramid a panagselebrar ti Paskua 2011. 

Naaramid  dagiti aktibidades a nangparagsak ti selebrasion  kas iti parlor games, exchange gift, intermission number, panagpipinnadamag sa naisaruno ti salu-salo para iti pangngaldaw. Kalpasanna, nagturong ti grupo dagiti Day Care Workers iti Munisipio ket nataming/naited  babaen ti MSWDO dagiti dadduma pay a pakaseknanda ita a Paskua . # (Rinetrato ken insurat ni JOED S. SAJONIA)

No comments:

Post a Comment