Cabugao, Ilocos Sur – Nagselebrar ti Paskua 2011 ti sibubukel a Pederasion ti Senior Citizen ti 33 a barangays ti ili a Cabugao idi bigat ti Disiembre 15, 2011 nga indauluan da Office of the Senior Citizen Affairs Head Remigio B. Sunico ken Presidente Antonio N. Sabio iti Cabugao Cultural and Sports Complex, Brgy. Rizal, Cabugao, Ilocos Sur.
Napnuan regta ken ragsak dagiti nataengan (lallakay ken babbaket) ket nasapada a nagtataripnong iti dayta a bigat. Impamatmat dagiti nagpartisipar a nataengan a nangirepresentaranda ti barangayda ti kabaelanda nga agdaniw, agkanta ken agsala a nakaray-awan dagiti nagbuya kangrunaan ti benneg ti LGU nga idauluan ni Mayor Edgardo “Ediboy” S. Cobangbang, Jr. ken Mrs. Lydia S. Gazmen, Municipal Social Welfare Development Officer ti Cabugao.
“Bigbigenmi a pagulidanan dagiti impakitayo ken insuroyo a napipintas a bambanag kadakami nga ub-ubbing,” impeksa ni Mayor Ediboy iti panagsaritana. “Ket gapu ta naited kanyami ti talek nga agserbi para iti pagsayaatan ti kaaduan, kayatmi met a subadan dagita nga an-anusyo babaen iti rukod ti kabaelan ti Gobierno Munisipal a pangtulong kadagiti nataengan.”
 |
| Taripnong dagiti Senior Citizens a nagatendar ti nasao a Programa |
Dinakamat ni Mayor Ediboy ti ited ti LGU a lote para kadagiti Senior Citizens, madagdagus a panangipatungpalda ken panangnayonda kadagiti programa nga iyetnag ti National Government a pagimbagan dagiti nataengan kas iti pension, pannakadiskuento ken kaarngina a benepisio: material wenno social a pannakabitibitda.
Ragsak ken talna a di bumurong ti gubuayen ti “panangiburay-tayo iti ayat” iti pada a tao saan laeng nga ita a Paskua no di pay iti agnanayon, ti kaipapanan ti panagsarita ni Mrs. Lydia S. Gazmen, MSWD Officer. Iti agsalogen a tawtawen dagiti nataengan, makipagtaming ti DSWD Officer a maiyad-adda a maipaugali daytoy a galad tapno matun-oyan ti nabunga ken naragsak a panagbiag.
Kimmablaaw met ken nakipagrambak da SBM Vicky S. Serna ken SBM Carlito S. Pano, M.D., Chairman, Social Services a sarikedked ida dagiti nataengan iti maidatag a pakaseknanda idiay laem ti Hunta Munisipal.
Paset ti panagrambak ti pannakabunot ti nagan dagiti nagasat a nataengan a maikkan ti nasapa nga aginaldo. # (Insurat ni JOED S. SAJONIA)
 |
| Ti panagsarita ni Mayor Ediboy kadagiti Senior Citizens iti ili a Cabugao |
 |
| Panagsarita ni Mrs. Lydia S. Gazmen, MSWD Officer, ti kaiyulugan iti PASKUA |
No comments:
Post a Comment