Friday, December 16, 2011

“NAIDUMDUMA A PANAGSELEBRAR TI ABC TI PASKUA 2011!”

Cabugao, Ilocos Sur – Naidumduma ti panagselebrar dagiti opisiales ti Association  of Barangay Captains and Councils (ABC)  a pakabuklan ti 33 a barangays ti ili a Cabugao nga idauluan ni Rizal Brgy. Captain Teddy U. Soller iti Paskua 2011 a naangay sadiay Cabugao Cultural and Sports Complex karabiyan ti Disiembre 15, 2011.

Saggaysa laeng ti kurang ti sibubukel a  pakabuklan ti Konseho ti kada barangay a di nakaatendar maigapu iti nagduduma a rason tapno naan-anay a nakompleto ti bilang dagiti opisiales ti barangay (elective/appointive) a nangrambak ti Paskua 2011  iti dayta a rabii.

“Nabayagakon a nagtaktakem ngem ita laeng a naimatangak ti nagpaiduma a kinaurnos ken kinaragsak ti panagselebrar ti ABC ditoy ilitayo,” impeksa ni Vice Mayor Danny Q. Gazmen kalpasan a pinarubuatanna ti panagsaritana iti maysa nga estoria a napnuan kaipapanan iti akem dagiti opisiales iti panangannongda a naan-anay  dagiti pagrebbenganda.

Panagkaykaysa, panangsuporta iti agdama nga administrasion ken panangabrasa kadagiti programa ti Gobierno Munisipal nga idauluan ni Mayor Ediboy  ti bugas pay  ti panagsarita ni Vice Mayor Danny.

Impeksa met ni Mayor Ediboy ti nalaus a panagyaman ken ragsakna iti impakita ti  sibubukel nga ABC ken amin a kameng ti opisina ti LGU a nakipagnaming iti panagselebrar, umili ken sangaili ken  kadagiti pagteng a pakaikumkumitan ti ABC iti Gobierno Munisipal. Inyebkasna ti awan panangidumdumana a panangtratar ti Gobierno Munisipal ti tunggal opisiales ket kalikagumanna ti panagkaykaysa ti amin nga umili a mangituloy kadagiti pagsayaatan. Iti pannakaited ti talek kenkuana a mangrienda ti Gobierno Lokal, ti interes dagiti umili ti kangrunaan nga itandudona nga agserbi.

Nagsarita met ni ABC President, Rizal Brgy. Captain  Teddy U. Soller ket imbinsabinsana  ti akemna a mangidur-as iti aniaman a pakaseknan ti barbarangay sadiay laem ti Sangguniang Bayan. 

Dinakamatna dagiti nalpas ken naiteden a serbisio ken proyekto  kadagiti barangay ket kinaritna dagiti opisiales a makitinnulongda ken makipagpanunotda iti dadduma pay a maaramid a pangpasayaat ti barangayda ta sisasagana a mangbitibit kadakuada a mangpaaprobar iti opisina ti Mayor ken Bise Mayor.

Nabaetan dagiti panagmensahe iti pabuya a kangrunaan ti panagkanta nga imparang dagiti “Talentadong Opisyal” ken pannakabunot ti numero ti Raffle Draw ket umawat ti mapagasatan nga opisial iti agkakapateg a sagut  a naisangrat a pangparagsak iti panagselebrarda.

Iti nasao a selebrasion, kinablaawan ken inabrasa dagiti padana nga opisiales ti barangayna ken ti ABC  ken amin a naitallaong   ni  Sabang Brgy. Captain Edgardo S. Cobangbang, Sr. iti  pannakadanon ti petsa ti panagkasangayna.

Nakipaset met iti panagselebrar dagiti kameng ti nadumaduma nga opisina ti LGU, Barangay Tanod/BPATS, dadduma nga umili,   kasta met a nakidinnanggay  da  Mr. Jeremy Seguban, akinkukua ti SEGUBAN ENTERPRISES   ken Ex-SB Member Carlos Sison.  # (Rinetrato ken insurat ni JOED S. SAJONIA)


No comments:

Post a Comment