ALTERNATIBO A WAGAS TAPNO DUMURDUR-AS TI DAYO

Cabugao, Ilocos Sur (Disiembre 20, 2011)  – Maysa kadagiti gannuat nga isayangkat ti Cabugao Livestock Traders Association (CLTA)  ket iti pannakagun-od ti umdas a  puonan ti asosasion manipud iti Gobierno Probinsial, pinansial a banag  ken mataraken nga ayup, tapno mabitibit ti agdama a kasasaad ti panaglako ken panagginnatang a kadawyan a mapaspasamak iti uneg ti Dayo.

Imbatad ni Elpidio Mejia, Sekretario ti CLTA a naipadanonen ti kalikagum iti opisina ti Gobernador babaen iti panangtarabay ti Gobierno Munisipal nga irepresentaran ni Rizal Brgy. Captain Teddy U. Soller ket manamnama a maaksionan ken maipatungpal daytoy iti kabiitan a panawen.

Babaen kadaytoy a wagas, manayonan ti agrikus a puonan a paggatang ti ayup ken iti bilang ti mailako no kaspangarigan  agkirang ti suplay nga animales para iti Dayo.

Imbatad ni Dr. Melvin Castro, DVM, Municipal Livestock Inspector a kanunonganna iti pammaliiw ni Marciano Raciles, Presidente ti CLTA,  nga adda saggaysa a mapaspasamak a transaksion iti ruar ti Dayo ngem kaaduanna nga agtungpal iti pagdadaywan ken saan a makalusot iti pagbayadan iti Munisipio gapu ta maarisitda met manipud  iti Barangay a maseknan a tungpal ti amin  sakbay a maipaili ti pannakaitresperensia ti papeles ken panaginnawat ti dua a partido.

“Awanen ti makapagkusit wenno makapaglibas  ta no masukalanda ket maperdi met ti reputasionda a maki-Dayo, isu a tarimaanenda met a manteneren ti napintas a rekordda tapno mapagpiaran dagiti Dumadayo,” innayon ni Dr. Castro.

Kabayatanna, tapno bumun-as ken bumileg ti puli ti kanuangan, itultuloy da Dr. Castro nga ipatungpal  ti “artificial insemination” ti buffalo kadagiti ayup iti  Barbarangay kas iti narugianandan  iti Barangay Quezon, Barangay Maradodon ken nakaeskediul a papananda a barangay iti tunggal lawas. Segun pay ken ni Dr. Castro, puminpintas ti mapatanor ita nga ayup ta saanda unayen a maritur iti trabaho gapu ta adun ti katulonganda a makinaria a kas iti tractor, kuliglig a mangkessay ti panawen a pannakaigugor dagiti ayup iti obra ti talon ken bangkag.

Amin dagitoy a gannuat   ket  pannakaidur-as ti programa para iti sektor ti  Agrikultura babaen iti Gobierno Munisipal nga idadauluan ni Mayor Edgardo “Ediboy” S. Cobangbang, Jr. # (Web Research)