Cabugao, Ilocos Sur (Disiembre 6, 2011) – Iti panagbisita ti Web In-Action iti Brgy. Nagsantaan, Cabugao, Ilocos Sur, maysa kadagiti kapatgan a proyekto a nakita ket iti nakongkreto a kalsada ken iti nasimpa nga slope protection ti agsumbangir a bakras ti kalsada ti barangay a kumamang iti Brgy. Nagsantaan Proper ken Brgy. Baracbac, Sinait, Ilocos Sur iti amianan ti Barangay.
“Adu koma manen a taktak ken napespes a ling-et ti bumarangay a nagobra no di inaksionan daras da Apo Mayor Ediboy daytoy a nagproblemaanmi,” kuna ni Kagawad Roberto “Polo” Sablay, Chairman, Committee on Agriculture ti Sangguniang Barangay.Innayon ni Kagawad Sablay a prayoridad nga idur-asda ti pannakakongkreto dagiti Farm-to-market-roads-da tapno nasaysayud ti panagdaliasat dagiti amin a bumisita iti barangayda nangruna iti pannakairuar ti produkto ken pannakataming dagiti kasapulan dagiti lumugar.
“Maobra latta met ketdi no agyuduyod daytoy nga parte ti kalsada ngem maiduma laeng ti pigsa ti makinaria ta nadardaras pay a malpas,” kuna met ni Apo Bernardino “Dinong” Peralta, agindeg ditoy a Barangay.
Iti pannakiuman ti nagsurat ken ni Brgy. Captain Mario Peralta ti Brgy. Nagsantaan, dakkel ti panagyamanda ken dagiti kalugaranna iti Gobierno Munisipal, Probinsial ken Kongresional iti agdama nga administrasion nga idauluan da Mayor Ediboy, Diputado Ryan, ken Gov. Chavit ta maited latta dagiti proyekto a kalikagumanda. Innayonna a narigat a pagpannurayan ti 20% Development Fund ti tinawen ti IRA ngem napipia laeng met ta adda naynayonan, innayon ti Ama ti Barangay, dati a Barangay Treasurer.
Segun pay iti agkabannuag a Kapitan a daytoy pay ti subad ken kaibatogan ti panagkaykaysada tapno manayonan latta ti proyekto agingga a mairingpas amin dagiti kangrunaan a pasilidades a kasapulanda iti barangayda. # (Web Research)
No comments:
Post a Comment