Sunday, December 18, 2011

BARANGAY BACLIG: NAGYAMAN DAGITI BUMARANGAY ITA A PASKUA 2011!

Cabugao, Ilocos Sur – Ti Barangay Baclig ket naragsak a  nangselebrar babaen ti simple a salu-salo ken pannakaaramid ti Nasantuan a Misa a pagyamanda a bumarangay   iti panagpiestada idi Disiembre 16, 2011 a segun ken ni Brgy. Captain Ely S. Savella a nupay simple laeng ita ti panangselebrarda (Piesta ken uray ti  Paskua 2011)  ket mainumo  a nagsaganada met  latta  tapno maipatungpalda dagitoy a nainggasatan/naipangruna  nga Aldaw.

Nagyaman dagiti lumugar ken opisialesda  iti nagun-odda a pammadayaw manipud iti Gobierno Munisipal nga idauluan ni Mayor Edgardo “Ediboy” S. Cobangbang, Jr. a kas “Laing Ti Barangay: Outstanding Barangay, Tree Park Category” ken 2nd Placer iti Lantern Parade Competition ti 33 a barangays ti ili a Cabugao idi Disiembre 1, 2011.

Ti Barangay Tree Park a masarakan iti sibay ti Karayan Cabugao ket ar-araken ita a pagpallailangan   ti Turista/bakasionista/bisita   ken pakaangayan ti seminar, programa wenno miting  gapu iti kinadalus ken kinalangto dagiti naimula a kayo ken bayog iti malas-udan ti lote ti Barangay Baclig. Dagiti naipuonan a sakripisio ken pannakabuangay daytoy a parke ket inrubuat da Kagawad Armando Azcueta ken Daydi-Dios ti aluadna, Kapitan Deco Savellano.

Mainayon ditoy, ti pannakagun-odda ti nainayon a lugan ti barangayda  ti mangparagsak kadagiti lumugar  ta adda mausar para iti pannakaidanon ti dadduma pay a porma ti  serbisio kadagiti bumarangay. 

Dagiti opisiales ti Barangay Baclig nga idauluan ni Punong Brgy. Ely S. Savella

LUGAR PAY TI BRGY. BACLIG  TI BANNUAR KEN KANATENGAN TI ILI A CABUGAO

No nagsaadan  ti lugar ti  pagpapatangan, awanen ti sapulem iti Barangay Baclig ta nupay maysa kadagiti barangay iti poblasion, makuna a naparaburan dagiti agindeg agsipud ta naidulonda iti pagtatalonan a pagmulmulaan ti pagay, nateng, ken nadumaduma a cash crops a kas iti kamatis, bawang, lasona, mais, sandia, utong, balatong, murod ken asidegda ti Karayan Cabugao iti amianan a nakaidarnapan ti adu a rama gapu ta nalames ta maaywanan a naimbag kadagiti illegal fishing babaen kadagiti opisiales ti barangay.

Iti arubayan ken sulsuli, adu met dagiti nalayog a kaykayo nga agbunga kas iti mangga, kaimito, kamantiris, sua, atis ken dadduma pay a fruit trees a pagdagasan dagiti billit ken saramsamen dagiti nasalun-at nga agindeg. Ditoy a barangay iti pakasarakam ti all-year round a  paagmulaan ti hybrid a tarong, sili ken dadduma pay ti klasena a nateng gapu ta nawaya pay laeng ti lugar ken saan a problema ti danum ken naannad dagiti adda dinguenna ta awan ti aggargarut!

Iti Sitio Callaguip, nawawasnay dagiti sinilong a pagmulaanda ti nagduduma ti klasena a  nateng, mais (amarilio  ken puraw), tabako, ken pagay (ditoy ti nakaaramidan ti   Demo-Farm ti Ilocos Integrated Agricultural Reasearch Center (ILIARC) - MMSU, Batac City based) a naimula babaen iti direct seeding ita a Dry Season Crop (2011-2012).

Ti Barangay Baclig ket Barrio Luna (Gen. Antonio Luna) ti dati a naganna. Naadaw ken nabaliwan ti naganna babaen iti panagkakammayet dagiti lider ti barangay nga indauluan daydi Nag-Kapitan Julian Somera ken lumugar a masuktan iti General Baclig a pammadayaw met iti nalatak a patanorna: ni Gen. Eustaquio S. Baclig, Sr.  ( Setiembre 16, 1893-Nobiembre 30, 1944)   nagturpos ti kinamilitar iti  West Point Academy, USA  idi 1917 ken bannuar idi  Maikadua a Gubat ti Sangalubongan. 

Ditoy met ti lugar ken pagtaengan ti maysa pay a nalatak a Heneral a patanor ti ili a Cabugao, ni Police General James G. Barbers, nagtakem nga opisial ti Polisia iti Kamanilaan ken nag-Bise Mayor ti  Siudad ti Manila idi panawen ni nag-Presidente Ferdinand E. Marcos.

Ti Barangay Baclig ket addaan iti kalawa a 227.5 ektarias ken 2,132 a bilang ti lumugar. Naidulon ti Barangay Baclig iti Barangay Margaay iti Amianan; Barangay Rizal iti Daya; Barangay Pila iti abagatan ken Barangay Turod iti Laud. Addaan iti dua a Sitios: ti Sitio Lusong Suyo ken Callaguip.

Iti agdama, addaan ti Barangay Baclig iti  P1,301,726.00  nga Internal Revenue Allotment wenno (IRA) a naidagup iti P1,371,726.00 nga Annual Budget iti CY 2011.

Kangrunaan a pakaigastuan ti 20% Development Fund nga aganay iti P260,345.20 ita a tawen 2011  ket dagiti sumaganad: pannakamantener ti Nutrision; Solid Waste Management; Mentenensia ti Brgy. Elf-Truck; Pannakamantener ti Water System Generator ken Grass Cutter; Clean and Green; Maintenance of Street Lights; Repair/ Maintenance of Roads and Bridges, Maintenance of Tree Park;  Kasapulan ti Barangay Tanod iti mausarda nga agserbisio.


Iti panagdur-as ti ili, maisursurot met ti panagdur-as ti barangay. Malaksid a ditoy ti nakaipasdekan ti Saranay Tobacco Trading Center, adda pay ti dakkel a pasdek ti negosio  iti Coca-Cola Bottlers Co iti Sitio Callaguip. Aktibo dagiti sari-sari store a paggatangan dagiti agindeg ti dadduma a kasapulanda iti inaldaw. Asideg ti merkado publiko ta mabalin a pagnaen no mapanka iti kabarbarbaro a tiendaan: ti Northern Ilocos Sur Trading Center. Ditoy pay ti paglakuan dagiti mannalon ti apitda a nateng ken mais a mangnayon ti masapulanda.

Kompleto met ti kangrunaan a pasilidad ken  dadduma a kasapulan   ti Barangay  kas iti Barangay Hall, Day Care Center, Pavement ken Barangay Stage, Barangay Nursery, Material Recovery Facility (MRF), Compost Pit, ken Barangay Tree Park a a nakapatanoran dagiti nawasnay a mahogany, gmelina, kawayan ken bayog a masarakan iti ampir ti karayan iti amianan ket makaawis ti imatang ti distansia ti pannakaimula dagitoy a kaykayo sumagmamano a tawenen ti napalabas.

Daytoy a gannuat ket inrugi ni Kagawad Armando  Azcueta ket matartaripato latta daytoy a tree plantation ken napagbalinen a Barangay Park  iti agdama.

Managpasangbay met ti Barangay Baclig. Kinapudnona, iti Sitio Lusong Suyo ket daytoy ti napili dagiti kakabsat a Muslim a pagnaedan. Naipatakder ditoy ti pasek ti Mosque a pagdaydayawanda ken napalikmutanen ti agkakadaeg a balbalay ta kaaduanna ti ginatangdan dagiti lote  a nagdissuanda.

Selebraran ti Barangay ti panagpiestada tunggal madanon gi Disiembre 16 ket ditoy a maipamatmatda ti naurnos a pagrambakda. Selselebraranda met no madanon ti aldaw a pannnakayanak ti bannuarda,  kada 16 ti mabilang ti bulan ti Setiembre , ni General Eustaquio S. Baclig, Sr. # (Insurat ken rinetrato ni JOED SABIO SAJONIA)
       
DAGITI AGDAMA NGA OPISIALES TI BARANGAY BACLIG
    Punong Barangay Ely S. Savella
    Kagawad  Eliseo R.Serrano
    Kagawad  Arnel Maximo A. IIar
    Kagawad  Armando S. Azcueta
    Kagawad  Mario S. Morales
    Kagawad  Evelyn P. Vallejo
    Kagawad  Modesto C. Agag
    Kagawad  Warren C. Tapuro
    SK Chairman  Arjay I. Socias
    Barangay  Secretary  Antonio N. Sabio
    Barangay  Treasurer  Veronica S. Pacag.
    Barangay Day Care Center Teacher  Jessica  Sandi
    Barangay  Nutrition Scholar Gloria  Segui

No comments:

Post a Comment