Cabugao, Ilocos Sur – Aglaplapusanan ti rag-o ken ragsak dagiti mannalon a kameng ti Turod Multipurpose Cooperative (Turod MPC) nga idauluan ni Cooperative Manager, Brgy. Capt. Inocencio Sadac ta naipatuloden ti kabarbaro a Farm Tractor a kinalikagumanda nga uggoren, maneharen nga agserbi kadakuada ken makasapul pay a padada a mannalon iti ili a Cabugao, Ilocos Sur.
Naidagas ti baro a makinaria iti Munisipio babaen ti panangiwardas ni Mr. Noel C. Gonzales, Sales Engineer ti MAGCO, INC. nga aglaklako ken distributor ti Massey Ferguson Brand (Brazil ken England) ti Farm Tractor.
Kinapatang met ni Mayor Ediboy dagiti pannakabagi ti MAGCO, INC. ket nadakamatna a natalingenngen itan ti kapampanunotan dagiti mannalon a kakadua ni Kapitan Ino a pakaitalkan ti baro a makinaria ta nagatangen a saan ketdi a matintinnagan ken masiguradoda nga agpaut a mausarda ta apagda ti kadakkelan a desision para iti makinaria.
 |
| Da Brgy. Capt. Inocencio Sadac ken dagiti kameng ti MAGCO, INC. nga idauluan ni Mr. Noel C. Gonzales, Sales Engineer |
Segun ken ni Mr. Gonzales a maikkan ti pribilehio dagiti pakaitedan ti Farm Tractor iti one-year warranty ken umayda asistiran ti mangoperar ti makinaria inton damo nga usarenda tapno maiwanwanda ida ti umisu ken naannad a pannakausar ti makinaria tapno napaut ti usar daytoy.
Ti Farm Tractor ket napataud babaen ti pannangted ni Diputado Ryan Luis V. Singson ti P1.5 Million a counterpart a nainayon iti P1.2 Milion a pannakabagi ti DA-RFU 1. Agkair a P2.7 Million ti balor ti baro a traktora. Maitalek, imanehar ken manteneren ti Turod MPC ken tarabayen ti Gobierno Munisipal ti ili a Cabugao ti pannakatagiben/pannakausar daytoy a makinaria. Pinagyamanan met unay da Kapitan Sadac ken kakaduana da Diputado Ryan, Mayor Ediboy ken ti DA-RFU 1 iti nagun-odda a baro a makinaria. # (Rinetrato Alvin Solis ken insurat ni JOED S. SAJONIA)
No comments:
Post a Comment