Saturday, December 10, 2011

LIPIT BARANGAY FIESTA 2011, NABALLIGI!

Cabugao, Ilocos  Sur – Naangay ti  kaaldawan/Koronasion ti panagpiesta ti Barangay Lipit, Cabugao, Ilocos Sur nga idauluan ni Barangay Captain Bernardo Salom idi Disiembre 8, 2011.

Sakbayna, nangrugi ti Basketball Tournament a kas pakauna a pangragsak ti Piesta idi Nobiembre 28, 2011 ken  naangay iti Championship Games/Parlor Games idi Disiembre 7, 2011.

Iti karabiyan ti Disiembre 8, 2011, nakoronaan ti napili a Reyna ti Piesta, Queen Jewel Irish Sardeng a binayabay ni  Prince Jhereme Castillo. Ni Miss Lovelle Salom ti Reyna idi Piesta 2008.

Kinoronaan ni Diputado Ryan Luis V. Singson, kangrunaan a sangaili, ni Reyna, Miss  Jewel  Irish Sardeng  idinto ta ni Mayor Edgardo “Ediboy” S. Cobangbang, Jr.  ti nangorona  iti Umuna a Prinsesa,  Miss Angelica Pacpaco. Binagi met nga insaadan  ti korona ni Board Member Christian “Basi” Purisima ti Maikadua a Prinsesa,  Miss Patrice Nicole Pascual .

Nagyaman ken kimmablaaw ni Diputado Ryan kadagiti bumarangay ti Barangay Lipit ken iti umili ti Cabugao. Kangrunaan a dinakamatna ti pannakai-proyekto ti Covered Court iti Barangay Lipit.

Pamaskua a Mensahe ti imburay ni  Mayor Ediboy. Kimmablaaw ken nagyaman iti naurnos ken naballigi a pannakaorganisar ti panagpiesta ti Barangay Lipit. Innayon ti Alkalde a taginayonen koma dagiti bumarangay daytoy a naipakitada a tagipatgen a galad ti bumarangay.

Timmulong iti panagpiesta ti Barangay Lipit ti  Liga ng mga Punong Barangay ti Cabugao nga idauluan ni ABC President Teddy U. Soller, MJ 2s Farm Supply, Mr. Jun Saribay ken SK Federation President Benazir Sarmiento.

Nagpaay nga Emcee da Mrs. Lorna Castillo, Miss Aiza Castillo ken Miss Rona Castillo. # (Web In-Action)

No comments:

Post a Comment