Thursday, June 18, 2015

2nd DAY RYAN RICE DISTRIBUTION TI CABUGAO, NABALLIGI

Cabugao, llocos Sur – Naaramid ti maikadua nga aldaw iti distribusion ti  HR 182 (Ryan Rice) babaen iti Ryan Hybrid Rice Assistance Program a proyekto ti Provincial Government ken iti Department of Agriculture (DA) kadagiti ID Card Holder a mannalon iti duapulo ket dua (22)  a nabatbati a barangay ket iti bigat ti Hunio 18, 2015 ket sangapulo ket maysa (11)  a barangay  a naed dagiti mannalon ti naggigiddan a naikkan ti bukel   a kas iti Brgy. Bonifacio, Turod Patac,  Rizal, Baclig, Sagayaden, Alina-ay, Cuancabal, Cuantacla, Lipit, Pila ken Arnap.


Kamalman iti dayta a petsa, naisaganad nga immay immawat dagiti mannalon ti maikatlo a nayeskediul a pakabuklan ti sangapulo ket maysa a barangay a kas iti Brgy. Pug-os, Namruangan, Daclapan, Bungro, Salapasap, Salomague, Sabang, Dardarat, Marga-ay, Quezon  ken Turod.

Sag-dudua a pack a Hybrid Rice 182 (Ryan Rice) ti  maited iti tunggal naka-ID a Farmer babaen iti panangiyawat  dagiti pannakabagi ti DA-LGU nga idauluan ni Acting Municipal Agriculturist Robert S. Savella. Naurnos ti pannakaiwaras ti nasao a subsidized seeds kadagiti mannalon agsipud ta makilinia dagiti mannalon iti batog ti lamisaan a mangasikaso iti pannakaited ti isakadada iti agited ti bukel.

Kinuna ni Mr. Savella nga adda met latta dagiti mannalon a saan a nakaumay maigapu iti di napakpakadaan a makagapu wenno adda nainkalintegan a rasonda  ket mismo nga isudanto  ti umay mangala iti maited kadakuada a bukel. 

Iti bigat dayta a petsa, nakidanggay dagiti Opisiales ti Munisipio nga idauluan ni Mayor Edgardo “Ediboy” S. Cobangbang, Jr. a binayabay da SBM Danny Q. Gazmen; Dr. Jemaima S. Tan-Yee; SBM Josefina S. Vallejo ken ni ABC President, Brgy. Captain Thaddeus “Teddy” U.  Soller kabayatan iti pannakaiwaras dagiti bukel kadagiti mannalon. # (Web In-Action)

No comments:

Post a Comment