Wednesday, June 17, 2015

RYAN RICE, NARUGIAN A MAITED KADAGITI MANNALON TI CABUGAO

Cabugao, llocos Sur – Naaramid ti pannakai-turnover ti HR (Ryan Rice) babaen iti Ryan Hybrid Rice Assistance Program a proyekto ti Provincial Government ken iti Department of Agriculture (DA) kadagiti mannalon ti Cabugao, Ilocos Sur nga umabot iti 4, 600 a bilangda ken  addaanda iti ID Card.


Iti umuna nga aldaw ti distribusion, Hunio 17, 2015, dagiti Farmers ti sangapulo ket maysa (11) a barangay a pakaibilangan ti Brgy. Bato, Nagsantaan, Cael-layan, Reppa-ac, Maradodon, Catucdaan, Sisim, Aragan, Nagsincaoan, Carusipan  ken Cacadiran ti umuna a mangawat iti sag-dudua a pack a Hybrid Rice 182 (Ryan Rice) ti  tunggal naka-ID a Farmer babaen iti panangiyawat  dagiti pannakabagi ti DA-LGU nga idauluan ni Acting Municipal Agriculturist Robert S. Savella.

Iti mensahe ni Mayor Edgardo “Ediboy” S. Cobangbang, Jr., kimmablaaw ken nagyaman kadagiti mannalon ta ammoda a tuntonen ti serbisio a para kadakuada ket inggunamgunam ti Ama ti ili a dagitoy a napateg a maited  kadakuada  a pagrubuatanda nga agmula ket ammoda koma ti agyaman, taginayonenda ti kinamanagtungpalda iti pagannurotan ken no makitada dagiti adda iti Gobierno Probinsial nga idauluan da Gov. Ryan ken ni Vice Gov. DV ket agyamanda latta tapno dida latta maum-uma a mangted iti pagsayaatan dagiti mannalon nangruna iti ili ti Cabugao, Ilocos Sur.


Nangipaay met ti mensahe ni SBM Benedicto M. Savellano, Committee Chair on Agriculture, Fisheries and Cooperatives ket imbatadna ti agtultuloy a panggep ti LGU-Cabugao nga di agsardeng  a tumulong kadagiti mannalon ken sangsangkamaysada koma a mangpaprogreso ti ili ti Cabugao.

Nakikaysa met iti nasao a taripnong ni ABC President, Brgy. Captain Thaddeus “Teddy” U.  Soller. # (Web In-Action)

No comments:

Post a Comment