Wednesday, June 17, 2015

PANAGANNAD TI SAKIT: IPALAGIP TI RHU

Cabugao, Ilocos Sur – Iti pannaki-amad ti Web In-Action idi Hunio  15, 2015, impakaammo ni Dr. Bernardino P. De Gracia III, OIC Municipal Health Officer  ti ili a Cabugao a kangrunaan unay ita ti panagan-annad ti maysa nga indibidual tapno saan a makapet kadagiti sakit iti panagbaliw ti klima.

Innayon ni Dr. De Gracia a malaksid iti panaggurigor, panateng-uyek a pakadlawan pay ti sintomas dagiti nakaro a sakit, panawen pay ita ti panagkakawa. Ipalpalagip latta  ti Doktor a kangrunaan ita iti panagdaldalus, ehersisio, balance-diet, inana ken recreation ken dadduma pay nga annuroten iti natibker a salun-at tapno nasimbeng latta iti immunity (salaknib) ti bagi iti saksakit.

Kas iti gagangay, adu ti bilang ti umili nga umay nga inaldaw nga agpaagas iti RHU pakaseknan iti medical check-up, pa-Blood Pressure (BP), Dental, Pre-natal, Immunization a buklen dagiti inna, maladaga, ubbing, agtutubo, lallakay ken babbaket.

Dagitoy nga aksion ken inisiatiba ket maigapu iti panagkammayet ti LGU-Cabugao ken ti Ahensia ti DOH iti pannakaipromot ti programa para iti  salun-at dagiti umili. # (Web In-Action)

No comments:

Post a Comment