Monday, June 22, 2015

PAMMIGBIG DAGITI GAPUANAN DAGITI SANGA TI LGU, NAITED

Cabugao, Ilocos Sur – Kalpasan ti Flag Ceremony iti Pamilia LGU-Cabugao iti  Hunio 22, 2015 iti sango ti Municipal Hall, nagsarita ni Mayor Edgardo “Ediboy” S. Cobangbang, Jr. ket kimmablaaw ken pinagyamananna dagiti proyekto ken gapuanan ti LGU-Cabugao  iti napalabas a lawas.  Bininsana dagiti Departamento ken sanga ti LGU-Cabugao a maipaayan iti pammigbig gapu iti gapuananda iti kallabes a lawas a pakaidaydayawan ti ili ken iti sapasap a kas iti sumaganad:

1.Naregget a pannakikaysa dagiti kameng ti MDRRMC-Cabugao kadagiti programa ken aktibidad  ti PDRMMC-Ilocos Sur a nangbigbigan met ni Gov. Ryan Luis V. Singson iti agtultuloy a suportada.
2.Naballigi a krusada ti Kapolisan iti pakaseknan ti maiparit nga agas.
3.Naballigi a panangtunton ti DA-LGU kadagiti serbisio a maipaay kadagiti mannalon babaen kadagiti sumaganad:
A.Pannakagun-od ti adu a makinaria para iti Asosasion ken Barangay ti Barangay Carusipan. Dua laeng ti inikkan ti DA-RFO 1 (Tagudin ken Cabugao).
B.Pannakaited ti libre a bukel babaen iti Ryan Hybrid Assistance Program iti umabot ti 4,600 a Farmers/ID Holder ti Cabugao.
C.Pannakaited ti Proyekto ti Small Water Irrigation System Association Project iti Balay-oac Diversion Dam IA iti Brgy. Pug-os, Cabugao, Ilocos Sur.
D.Naballigi a pannakaited ti proyekto iti irigasion kadagiti dadduma a pananuman iti ili ti  Cabugao babaen iti panangesponsor ti National Tobacco Administration (NTA).
E.Mapatgan a kalikagum dagiti mannalon a mangbisita iti National SWISA Awardee idiay Alcala, Cagayan.
F.Pannakaipaay ti Social Pension kadagiti nataengan idi Hunio 21, 2015 nga aggatad iti nasurok a maysa a milion a pesos.
G.Pannakairubuat ti pannakapatakder ti Municipal Fishport idiay Barangay Salomague, Cabugao, Ilocos Sur babaen iti BFAR ken katinnulong nga Ahensia  a pakabenepisiaran dagiti kabangibang nga ili ken Probinsia.

Innayon ni Mayor Ediboy a maibilang dagitoy a Testamento wenno pakakitaan  iti nasayaat a kinnaawatan dagiti maseknan nga ahensia ken institusion iti Gobierno Munisipal ti Cabugao.

Inulit nga impeksa  ni Mayor Ediboy  iti ragsakna ken panagyamanna. # (Web In-Action)

No comments:

Post a Comment