Friday, June 19, 2015

MAISAGSAGANA DAGITI MUNICIPAL GREENHOUSE A MAMULAAN

Cabugao, Ilocos Sur –Mamulaan ita a  Tawen 2015 iti agduduma ti klasena a nateng iti ruar ken uneg ti dua a Greenhouse a tarawidwidan ti Munisipio.  Naited dagitoy a proyekto babaen iti High Value Crops Development Program ti Department of Agriculture,  Regional Field Office, Region 1 (DA-RFO 1). Daytoy a pagmulaan ket napataud babaen iti lungalong ken agtultuloy a panagkammayet ti LGU-Cabugao nga idauluan ni Mayor Edgardo “Ediboy” S. Cobangbang, Jr.  ken ti DA-RFO 1.

Segun ken ni Mr. Obas Bill Y. Baclig, AT, Municipal Greenhouse Caretaker, a nagtenganen ti panagtutudo a bulbulan ket rinugianda nga isagana ti Greenhouse ken irusatda ti agmula ken agibunubon ti nagduduma ti klasena a nateng tapno maikkan dagiti agkasapulan a mannalon ken mapatuladanda iti publiko iti pateg ti panagmulmula a daytoy ket mangnayon iti pagbiagan  dagiti mayoridad a mannalon nga umili ti Cabugao babaen iti pannakaimula dagiti hybrid a nateng a nadaras a pagkakitaan.

Kadua ni Mr. Baclig ti Greenhouse a mangas-asikaso iti pannakadalus ken pannakamula daytoy a demonstration area dagiti JO's  Personnel iti Munisipio    babaen iti pannakamula dagiti naitiempo  a nateng tapno maparegta dagiti mannalon nga agmula no adda makitada a pakatignayanda.

Iti kallabes a Cropping Season, namulaan met laeng iti kas kadagiti nadakamat a hybrid a bukel ti nateng ket naballigi ti pannakaidemonstrarna babaen met laeng iti panagtinnulong da Mr. Obas Bill Y. Baclig, AT ken dagiti kakaduana nga agas-asikaso kadagiti naimula.

Dagitoy nga aksion ken inisiatiba ket gubuay ti napintek a programa ti Gobierno Munisipal a mangipakat kadagiti wagas ken teknolohia nga ipagteng ti DA-RFO  1 babaen iti HVCDP-LGU Cabugao nga imatonan ni Mrs. Ester P. Aguimbag, AT,  nangruna iti panagpatanoran ti nateng  tapno saan a maudi dagiti mannalon ditoy a Munisipalidad no maipapan iti pagtaraon a nateng. # (Web Situational Report)

No comments:

Post a Comment