ADU PAY NGA SKILLS TRAINING, MAPADPADAANAN

Cabugao, Ilocos Sur – Naaramid ti panagtitipon dagiti Trainees (4 P’s Beneficiaries) iti 33 a barangay ti ili a Cabugao tapno leppasenda a pirmaan dagiti kasapulan a papeles iti pannakaited  ti pundo a mausar iti panagsanay manipud iti DSWD.

Kalpasan nga inlawlawag da Mr. Dennis P. Aguimbag, SLP-PDO ti SLP-DSWD ken ni Mrs. Wilma S. Cruz, Focal Person ti SLP Cabugao dagiti aramiden dagiti Trainees, nagsarita ni Mayor Edgardo  “Ediboy” S. Cobangbang, Jr. 

Kimmablaaw ken nagyaman ni Mayor Ediboy ta ditoy manen ili a Cabugao ti  pakaaramidan  ti pa-Training ti DSWD nga aggatad iti Dua a Million a Pisos a napauluan iti Good Agricultural Practices (GAP)  on Vegetable Production. Innayonna nga addada a sibubukel nga Opisiales ti Gobierno Munisipal ta kitaenda no kasano a makomplementaran daytoy a programa ti DSWD babaen iti pannakaited met dagiti lebre ken mayataday a klase ti bukel ti nateng ken organiko a ganagan para iti vegetable production.

Impaganetget  ti Ama ti Ili a  masapul a  lalaingenda ti agsanay   ken makisinnabat kadagiti programa ti DSWD ta dakkel a pakaidaydayawanna ti nadaras a pannakasursuroda ken mangipateg dagiti inadalda a mangnayon iti matgedanda a para kadakuada ken iti pamiliada. Iti kasta, ad-adu pay ti ited ti DSWD a panagsanay ditoy ili a Cabugao a makatulong kadagiti makasapul iti pamataudan ti  pagbiaganda.

Iti nasao a panagtitipon, nakikaysa  da MSWD Officer Mrs. Lydia S. Gazmen; Mrs. Wilma S. Cruz, Focal Person ti SLP Cabugao;ken ni  Mr. Dennis P. Aguimbag, SLP-PDO ti SLP-DSWD ken kasta metten dagiti Staff ti MSWDO-Cabugao ken ti 4 P’s  Municipal Link-Cabugao. 

Innayon ni Mr. Aguimbag  nga umun-una a maaramid ti panagsanay maipapan iti  Gilnet nga aggatad ti 1.2 Million a pakabenepisiaran ti 171 a 4 P’s Trainees iti 6 a Coastal Barangay ti ili. 

Timmarabay met ni Vice Mayor DJ Savellano ken dagiti Konsehales ti ili nga isuda SBM Danny Q. Gazmen; SBM Vicky S. Serna, SBM Dr. Jemaima S. Tan-Yee,  SBM Josefina S. Vallejo, SBM Jayhan Alcid-Tan, SBM Benedicto M. Savellano; SBM Atty.  Bryan Jett S. Pano, Committee Chairman on Social Services; ABC President Teddy U. Soller ken ni Brgy. Captain Arnold “Bambi” Yangat. # (Web In-Action)