MEAT PROCESSING FACILITY ITI BRGY. DACLAPAN, MAUS-USAREN

Cabugao, Ilocos Sur – Dakkel ita a tulong kadagiti agar-aramid ti Kalientes  iti Barangay Daclapan ti ili a Cabugao, Ilocos Sur maigapu iti kaaddan ti napatakder a pasilidad ti pagprosesuanda ti lalat ti animal a maaramid a kalientes a pagaayat a pagtaraon dagiti aggatang ken lumugar.

Segun ken ni Mr. Edgar S. Balangatan, Municipal BUB Focal Person a maaddaan ti RIC Daclapan iti  sanitized facility, amin nga apparatus ket stainless ken makina ti agiwa ti karne. Idi ngamin ket backyard ken homemade production lattan ket saanda a pimmasa iti quality evaluation. No agtudo idin ket didan makaaramid ti kalientes nga ilakoda.

Sakbayna, naipasdek ti Meat Processing Facility babaen iti panangipatungpal  ti Department of Trade and Industry (DTI) ken iti LGU-Cabugao, Ilocos Sur nga idauluan ni Mayor Edgardo “Ediboy” S. Cobangbang, Jr.

Naaramid daytoy a proyekto babaen iti pundo ti Grassroots Participatory and Budgeting Planning manipud iti DTI ken ti LGU-Cabugao.

Daytoy a proyekto ket tarawidwidan ti Rural Improvement Club (RIC) ditoy a barangay a tarabayen ti Barangay Council nga idauluan ni Brgy. Captain Charlie Somejo.

Kanaig daytoy, nag-training dagiti kameng ti Rural Improvement Club (RIC) iti Barangay Daclapan, Cabugao, Ilocos Sur idi Oktubre  24, 2014 iti Daclapan Multipurpose Building babaen iti panangigannuat dagiti pannakabagi ti DA-LGU Cabugao ken ti Department of Trade Industry (DTI) Vigan City iti panangibagi ni Mr. Yolando Quiocho, DTI Officer.

Manamnama nga iti panagoperar daytoy a pasilidad ket makatulong iti pamilia dagiti RIC Members kasta metten  iti dayta a komunidad tapno dumur-as daytoy a livelihood project dagiti kababaihan ditoy a barangay. 

Naiyallawat pay ti tallopulo  a Uratex Monobloc Chair ken tallo a Uratex Monobloc Table kadagiti Opisiales ken Kameng ti Brgy. Daclapan Rural Improvement Club (RIC) nga idauluan ni Ms. Teresita Savella, RIC President.

Dagitoy a naited a ramit ket inted  ni Mayor Edgardo “Ediboy” S. Cobangbang, Jr. iti nadakamat nga Asosasion dagiti inna.

Kabayatanna, impeksa dagiti kameng ti RIC Daclapan iti nalaus a panagyamanda iti Ama ti Ili iti naited a tulong kadakuada a mainayon nga  usaren ti Asosasion ken  kasapulanda pay  no agmimitingda ken adda maaramid a programa ken aktibidadda. # (Web In-Action)