WEIGHING SCALE, INTED TI DTI ITI LGU-CABUGAO

Cabugao, Ilocos Sur – Impakaammo ni Mr. Edgar S. Balangatan, Municipal-DTI Coordinator a nangited  iti nayon a  pagkiluan ti  DTI-Ilocos Sur para iti ili tapno masaluadan dagiti aggatgatang, aglaklako ken negosyante iti merkado publiko ket nadardaras ti panagdur-as ti negosio ditoy a a merkado ti amianan nga Ilocos Sur.

Kabayatanna, impakaammo ni Mrs. Norma S. Bertumen, Market Supervisor ti Cabugao NISTC Public Market  a taginayonenda ti pannakaipaay ti napintas a serbisio kadagiti aggatang ken aglaklako iti nadumaduma a kasapulan ti pagbiag iti uneg ti Tiendaan (NISTC)  ti ili a  Cabugao. 

Innayon ni Mrs. Bertumen nga adda regular a koordinasion kadakuada ken panagmonitor dagiti pannakabagi ti Department of Trade and Industry (DTI)-Vigan City iti pakaseknan ti presio ken pagkiluan iti Tiendaan. Sakbayna, addan naipasdek  a “Timbangan ng Bayan” iti dua a disso, ti kanatengan ken kakarnean/kaikanan tapno adda pangkitaan dagiti aggatgatang no umisu met laeng ti kilo iti nagatangda ngem agpatingga laeng iti 15 Kilograms dagitoy a pagkiluan a libre. 

Malaksid iti pannakamonitor ti presio, pagkiluan, pasilidades ti tiendaan ket maipampamaysa iti pannakamantener ti kinadalus  ti uneg ken aglikmut ti tiendaan. # (Web In-Action)