Cabugao,, Ilocos Sur - Naangay ti panagtitipon dagiti Opisiales/Kameng ti New Cabugao Onion and Garlic Growers Association nga idauluan ni Mr. Henry B. Saliganan iti sango ti Municipal Building, Cabugao, Ilocos Sur idi Oktubre 16, 2015 .
Segun ken ni Mrs. Ester P. Aguimbag, Municipal HVCDP Coordinator nga umabot ti 45 dagiti Miembros iti nasao nga Asosasion.
Kangrunaan a napagnunumuan kadaytoy a panagtitiponda ket iti panangalada iti mabatayanda nga imulada a bawang nga inted ti DA-RFO 1 para iti High Value Crop Development Program (HVCDP) a pagpuonanda iti umay a panagmulada manen kadaytoy a cash crop.
Nakitaripnong ni Mayor Edgardo “Ediboy” S. Cobangbang, Jr. kadagiti mannalon kabayatan nga awatenda dagiti bin-ida a bawang. Kimmablaaw ken nagyaman iti daytoy a simmangpet a pagsayaatan a mangpalag-an manen ti rikna dagiti mannalon ti bawang tapno maisaganada a nasayaat iti panagmulada iti umay a Planting Season 2015. Dinayaw ti Alkalde Munisipal ta kabaelanen dagiti kailianna a tuntonen dagiti naipanawen a serbisio/programa manipud kadagiti maseknan kadakuada nga Ahensia a kas iti DA.
Imbatad ti Ama ti ili nga awan ti pangisukatanna iti mariknana a ragsak ta nagbalin isuna a Mayor iti kasisiglatan nga ili ken dagiti nasisiglat nga agnanaed nga ammoda a supapakan iti napintas a gapuanan dagiti maited kadakuada a pagpuonan a pamkuatan latta met dagiti Ahensia iti agtultuloy a panagitedda iti proyekto/programa kadagiti mannalon ditoy Cabugao.
Dinakamatna pay ti sangsangkamaysa a panangimatangda nga Opisiales daytoy a pagsayaatan nga awaten dagiti umili ken agyaman met kadagiti Konsehales iti Konseho Munisipal nga idauluan ni Vice Mayor DJ Savellano iti masindadaan latta a panangsuportada kadagiti lungalong ken gannuat a kas itoy iti pannakaparegget ti industria ti nateng partikular ti bawang ken lasona ditoy Munisipalidad ti Cabugao tapno manayonan ti matgedan dagiti mannalon ken agtultuloy a maital-o ti kasasaad ti panagbiagda.
Nakikaysa iti nasao a taripnong da SBM Danny Q. Gazmen; SBM Vicky S. Serna; SBM Atty. Bryan Jett S. Pano; SBM Benedicto M. Savellano; SBM Jayhan Alcid-Tan; SBM Josefina S. Vallejo ken ni Brgy. Captain Arnold “Bambi” Yangat. # (Web In-Action)
No comments:
Post a Comment