MAPADAYAWANDA ITI GAPUANANDA

Cabugao, Ilocos Sur – Kalpasan ti Flag Ceremony iti LGU-Cabugao idi Oktubre 12,  2015,  nagsarita 
ni Mayor Edgardo “Ediboy” S. Cobangbang, Jr. iti sanguanan ti Pamilia-LGU kasta metten kadagiti kameng ti Sangguniang Bayan; PNP;  BFP  iti dayta a gundaway.

Iti panagsarita ni Mayor Ediboy, kimmablaaw ken pinagyamananna    ta makitkita  latta   iti dayta a kasapana iti aldaw ti Lunes  iti kaadu ti umili  nga umay agpaagas/agpakonsulta   ken addada iti sanguanan   ti RHU-Cabugao; Lying-in Center ken iti Cecilia T. Flores Memorial Dental Clinic a naisibar kadaytoy a bloke a pakaipatakderan dagiti medical facilities ti Munisipio.

Innayon ni Mayor Ediboy nga maapresiar iti pannakaammoda a mangtunton kadagiti serbisio a rebbengda a magun-od. 

Pinadayawan ni Mayor Ediboy dagiti nagapuanan ti Municipal Police Station (MPS)-Cabugao gapu iti “police visibility”  ken iti napintas latta  a pannakamantener ti linak ken talna ti ili ken kasta metten iti Bureau of Fire babaen iti unipormeda a kanaig met la iti trabahoda kadagiti law enforcer .

Pinadayawan met ni Mayor Ediboy ti sibubukel nga Staff ti DA-LGU nga idauluan ni Acting Municipal Agriculturist Robert S. Savella iti naballigi a pannakaiwaras ti Ryan Corn Seeds kadagiti mannalon idi Oktubre 9, 2015 ditoy Munisipio. 

Binigbig latta met ti Ama ti Ili iti napintas manen a panagrubuat ti serbisio ti Pamilia-LGU ita a lawas ket inggunamgunamna a pakitaan ken pariknaanda  latta iti tuggal umili nga umay ditoy Munisipio iti nasayaat  a pannakilangen  gapu ta obligasion ti tunggal maysa iti mangipaay iti agtultuloy a napintas a serbisio para kadakuada. # (Web In-Action)