Cabugao, Ilocos Sur – Imbatad ni Dr. Melvin G. Castro, DVM, Municipal Livestock Inspector a mapawilanen dagiti Meat Vendor nga agiserrek iti Tiendaan (NISTC) iti Frozen Meat a naparti ken naggapu iti sabali nga ili kas kanayonan a pagannurotan iti panaglakuan iti karne iti nadakamat a Tiendaan ti ili.
Nupay kasta, saan a maipawil dagiti agindeg ditoy nga ili nga aglako iti Frozen Meat basta adda pagipalamiisanda kadagiti saanda a nailako.
Kabayatanna, maipalagip a nabukel dagiti pagannurotan iti kallabes a kas iti sumaganad:
. Saan a mabayag a maikubong ti maparti (24 oras sakbay ti pannakaparti) tapno maliklikan ti dupudop ken panagi-innakar no adda ti sakit ti ayup.
. Awanen ti or-oras ti panagparti (uray ti rabii) basta maipakada iti agrebbeng iti Slaughterhouse ken agbayad ti agparti iti pagrebbenganna iti LGU.
. Tingitingen dagiti aglako a ti maparti nga ayup ket agpadpada nga agsayaat iti agpauraga tapno maa-ayo met a gumatang ti agbirbirok ti partienna nga ayup/baboy.
.Kitaen met dagiti agpupuonan/agpappaparti a maikkan iti umisu a gunggona dagiti obrerosda tapno maliklikan ti sinnaur/kinnusit iti aniaman a banag a pakainaigan ti panagparti.
.Nailista babaen ti Management dagiti nasken a a mainayon a pakaseknan dagiti agpapauraga kas iti silaw ken pannakataming ti panagusaran ti danum idiay puesto ti tiendaan.
. Saan a maipalubos ti pannakaiserrek ti dadael a karne wenno masasao a “botcha” ken uray Frozen meat no awan ti pagipalamiisanna.
.Maipalubos a sumrek ti pagiluganan ti ayup/dinguen iti uneg ti Slaughterhouse ngem maparitan ti panagbuggoda ti lugan iti uneg daytoy.
Impeksa pay idi ni Meat Inspector Naval ti pakaseknanna iti pammilin a pannakaestrikto ti maiserrek a maparti a baboy nga aggapu iti sabali a probinsia. Kiniddawna a pagtitinnulonganda kadagiti partidor a tamingen ken ibirokanda ti solusion ti panagbaba ti suplay a maparti para iti Merkado a posible a mangipababa ti koleksion ti sapul ti opisina ti Meat Inspector.
Kanaig pay daytoy, maidurdur-as met dagiti pagannurotan nga itantandudo ti Provincial Government a kas iti naaramid itay nabiit a panagseminar dagiti Meat Inspectors manipud iti nadumaduma nga ili ditoy probinsia maipapan iti food hygienic and slaughtering practices.
Mismo a dagiti empleado ti Regional Meat Inspection Services ti nagpaay a Resource Persons iti tallo nga aldaw a seminar.
Segun ken ni Bokal Pablito Sanidad, Jr., napapanawen ti pannakaangay ti nasao a seminar ta nabukelen ti Provincial Meat Inspection Services babaen ti pinutarna a linteg.
Kinuna ti bokal a kasapulan nga addaanen iti meat inspector dagiti amin nga ili nga addaan iti slaughterhouse.
Kinuna ti Bokal a Rationale ti pannakaputar ti PMIS ti kaadda dagiti botcha a nailibas a naiserrek iti probinsia iti napalabas a natiliw ngem adu dagiti napukaw a mapapati a nailako ken naaramid a bagnet wenno longganisa.
Sakup ti Provincial Veterinary Office ti pannakabantay ti kalidad ti karne a sumsumrek iti Probinsia ken mailaklako iti Probinsia. # (Web In-Action)
No comments:
Post a Comment