Cabugao, Ilocos Sur – Kalpasan ti Flag Ceremony iti LGU-Cabugao idi Oktubre 4, 2015, nagsarita
ni Mayor Edgardo “Ediboy” S. Cobangbang, Jr. iti sanguanan ti Pamilia-LGU kasta metten kadagiti kameng ti Sangguniang Bayan; PNP; BFP iti dayta a gundaway.
Iti panagsarita ni Mayor Ediboy, kimmablaaw ken pinagyamananna ta makitkita iti dayta a kasapana iti kaadu ti umili nga umay agpaagas ken addada iti sanguanan ti RHU-Cabugao; Lying-in Center ken iti Cecilia T. Flores Memorial Dental Clinic a naisangrat kadaytoy a bloke a nakaipatakderan dagiti medical facilities ti Munisipio.
Innayon ni Mayor Ediboy nga maapresiar iti pannakaammo dagiti umili a mangtunton kadagiti serbisio a rebbengda a magun-od. Impadamagna pay nga adda manen sumarsaruno a pasilidad a maipasdek iti disso nga immakaran ti Cabugao PNP nga aggapu iti maysa a Pamilia a tumulong gapu iti agtultuloy a talekda iti pannakaibanag dagiti itedda a pagsayaatan dagiti kailianda.
Insupusopna a dagitoy ti maapresiar ken nabiag a testimonia ken pakakitaan ti turedda a tumulong ket maigapu amin dagitoy iti “collective effort” iti pannakaitandudo ti napudno a serbisio ken pannakaidur-as ti pagsayaatan dagiti umili.
Pinadayawan ni Mayor Ediboy dagiti nagapuanan ti Gobierno Munisipal ken iti napintas latta a panagrubuat ti serbisio ti Pamilia-LGU ita a lawas ket inggunamgunamna a pakitaan ken pariknaan latta iti tuggal umili nga umay ditoy Munisipio iti nasayaat a pannakilangen gapu ta obligasion ti tunggal maysa iti mangipaay iti agtultuloy a napintas a serbisio para kadakuada.
Kinablaawan pay ti Ama ti Ili dagiti agkasangay iti bulan ti Oktubre 2015. # (Web In-Action)
No comments:
Post a Comment