Cabugao, Ilocos Sur – Maar-aramid ti Dental Check-up kadagiti Day Care Pulpils iti intero a Munisipalidad ti Cabugao nangrugi idi Oktubre 5, 2015 iti Cecilia T. Flores Memorial Dental Clinic, Cabugao, Ilocos Sur.
Imbatad ni Mrs. Lydia S. Gazmen, MSWD Officer a babaen iti koordinasion ti MSWDO ken kadagiti Dodoktor ti Dental Clinic ket mayeskediul ti papan dagiti ubbing iti tunggal Day Care Center (DCC) nga agpaamiris iti ngipenda iti nasao a dental clinic.
Immuna a nagpa-Dental Check-up dagiti Day Care Pupils ti Barangay Baclig ket tinarabay ida ti Day Care Teacher-da ken inimatangan ti MSWD Officer ken kasta met ken ni Dr. Magno T. Sol, DMD agraman dagiti kameng ti Staff iti nasao a dental clinic.
Kabayatanna, dua a Dentista ti umay agserserbisio ditoy RHU-Cabugao ket adda naituding nga eskediulda a panangranta dagiti maseknan nga agpakita iti dental a pakaseknan.
Ngem maigapu iti kaaddan ti Cecilia T. Flores Memorial Dental Clinic ket deretso a makalawas (Lunes agingga iti Biyernes) ti naituding nga eskediul dagiti agserbi a Dentista ken nanayonan ti maysa pay nga isu ni Dr. Sharinelle Alberta Sy Ridulme, DMD, (Martes ken Miyerkoles ti batangna) ket kaduana da Dr. Magno R. Sol, DMD (Lunes ken Biyernes) ken ni Dr. Ma. Anastacia de los Reyes, DMD (Huwebes).
Maibasar pay iti pakdaar a naipaskin iti Pasdek ti Dental Clinic, ti Dental Check-up ket maaramid iti kada 1st ken 2nd Week (Huwebes) ti kada bulan idinto ta ti 2nd Week ken 4rth Week (Huwebes) iti kada bulan ket isu met ti panaggabutda ti ngipen kadagiti maseknan a pasiente.
Dagitoy nga aksion ken inisiatiba ket gubuay ti napintas a koordinasion iti DOH, Provincial Health Office ken iti LGU Cabugao nga idauluan ni Mayor Edgardo “Ediboy” S. Cobangbang, Jr. tapno mamantener ti dental a salun-at dagiti umili a maysa a kapatgan nga aspeto iti salun-at nga agtultuloy a matagiben. # (Web In-Action)
No comments:
Post a Comment