Tuesday, October 13, 2015

LIBRE A WHEELCHAIR, NAIPAAY ITI UPPAT A NATAENGAN

Cabugao, Ilocos Sur – Naikkan dagiti uppat a nataengan iti libre a wheelchair nga impaay ti Latter-Day Saint Charities (Mormon) babaen iti panangtarabay ti University of Northern Philippines (UNP), Vigan City nga idauluan ni Dr. Marciana De Vera, Director of Extension  kadagiti maseknan nga umili ti Cabugao, Ilocos Sur babaen iti pannakikammayetda iti Opisina ni Mayor Edgardo “Ediboy” S. Cobangbang, Jr. ken ti Opisina  ti MSWDO nga idauluan ni MSWD Officer Mrs. Lydia S. Gazmen.


Naited dagitoy a ramit kada Mr. Reynaldo Segui, 61, Barangay Baclig; Ms. Crescencia Barcena, 70, Brgy. Aragan; Ms. Felicidad Baclig, 83, Brgy. Catucdaan ken ni Mrs. Magdalena Saribay  ket impeksada ti naan-anay a panagyamanda iti panangilungalong ti Munisipio iti maseknan nga institusion iti  pannakaited iti libre a  wheelchair-da ita nga Oktubre 12, 2015 ditoy Munisipio.

Sakbayna, imbaga idi ni Dr. De Vera a napateg daytoy a sagut a programa a para kadagiti addaan ti an-annayen gapu ta libre a maited ket ti laeng panangipaay ti pamiliada  iti 40 oras a Community Service iti barangay ti katukad a pagrebbengan  ti maseknan babaen iti panangtarabay dagiti Opisiales ti Barangay iti agobra a kabagian ti pasiente.


Innayon idi  ti Director  a managan ti Mechanical Device and Humanitarian Project daytoy a trabahoda ket saan laeng nga iti Ilocos Sur ti pagserbisyuanda ta mabalin pay iti malas-udan ti Rehion Uno a lugar a turongenda  no adda agkalikagum a pasiente ti tulongda. Mangtedda iti libre nga scrutches; cane, walker ken wheelchair.

Nakikaysa ti sibubukel nga Opisiales ti LGU-Cabugao nga idauluan da Mayor Mayor Edgardo “Ediboy” S. Cobangbang, Jr.  ken ni Vice Mayor DJ Savellano agraman dagiti Konsehales-da nga isuda SBM Danny Q. Gazmen; SBM Vicky S. Serna; SBM Dr. Jemaima S. Tan-Yee; SBM Dodgie S. Santella;  SBM Jayhan Alcid-Tan; SBM Benedicto M. Savellano; SBM Josefina S. Vallejo; SBM Atty. Bryan Jett S. Pano ken kasta metten ni MSWDO Assistant Leonora G. Reintar.  # (Web In-Action)

No comments:

Post a Comment