Cabugao, Ilocos Sur – Segun ken ni Mr. Edgar S. Balangatan, BUB Municipal Coordinator a madama a maipaspasdek ti Barangay Health Station idiay Barangay Sabang, Cabugao, Ilocos Sur iti proyekto nga ited ti Department of Health (DOH) babaen iti programa ti Bottom-up Budgeting (BUB) ti DILG- ken ti National Anti-Poverty Commission (NAPC) ken kakammayetda pay nga Ahensia iti pannakaiyimplimentar daytoy a programa.
Innayon ni Mr. Balangatan a karaman iti Barangay Turod-Patac ken iti Barangay Reppa-ac iti maipatakderan iti maipada met la pasilidad ti salun-at tapno estratehiko iti pannakaiwardas ti serbisio ken programa ti salun-at kadagiti barangay ti Munisipalidad ti Cabugao.
Dagitoy nga aksion ken inisiatiba ket gubuay ti agtultuloy a pannakikammayet ti Gobierno Munisipal nga idauluan ni Mayor Edgardo “Ediboy” S. Cobangbang, Jr. kadagiti mayataday nga Ahensia a makatulong iti pannakaidur-as ti serbisio ti salun-at tapno maragpat a naan-anay dagiti programa, proyekto ken pasilidad a para kadagiti umili ti Cabugao iti benneg ti salun-at ken sanitasion. # (Web In-Action)
No comments:
Post a Comment