Monday, April 23, 2012

ALDAW TI NATAENGAN KEN UBBING ITI PIESTA, NAREGTADA A NAGPABUYA

Cabugao, Ilocos Sur – Kalpasan a naisayangkat  ti Fun Run, naaramid  ti panagparada dagiti opisiales ken kameng ti Federated Senior Citizens of Cabugao nga idauluan ni  Acting President Bonifacio Somera  ken Office of the Senior Citizen Association  (OSCA)  Head, Mr. Remigio B. Sunico.

Iti urnos ti parada, nakiragup da Mayor Edgardo “Ediboy” S. Cobangbang, Jr., Vice Mayor Danny Q. Gazmen, SB Member Vicky S.  Serna, SB Member Dr. Carlito S. Pano ken SB Member Jemaima Tan-Yee.

Nagrikus ti parada  iti Poblasion a nakabuklan dagiti opisiales ken kameng ti Senior Citizens iti 7 a Cluster Barangays a nangbayabayanda kadagiti float-da ken  nagluganan dagiti kandidatada.
Nagtungpal iti Cabugao Cultural and Sports Complex ti parada. Agur-uray met ti panagpabuya dagiti 8 a Cluster Day-Care Barangays a mangigannuat iti Modern Dance Competition a pakapremiuan ti mangabak ken kas partisipasionda iti Social Services Day (Abril 22, 2012) a tarabayen ti Municipal Social Welfare  and Development Office babaen ti panangidaulo ni MSWD Officer Lydia S. Gazmen.


Nangipaay  ti mensahe ni Mayor Ediboy ket pinagyamananna ti naurnos ken naragsak a panagpartisipar dagiti nataengan ken ubbing iti Piesta. Impeksa ti Ama  ti  Ili a saan a masubsubalitan dagitoy a panagayat nga inted dagitoy a sektor a mangannong met iti pannakipagselebrarda iti panagpiesta ti ili ti Cabugao. Innayon ti Alkalde a mangipakita daytoy ti naan-anay a kooperasionda  ken pammatida iti Gobierno Munisipal tapno mapadaeg ti panagpiesta ti ili.

“Sportsmanship” met ti bugas ti panagsarita ni SB Member Dr. Carlito S. Pano, Chairman, Komite ti Social Services kadagiti agsasalip nga ubbing. Kinablaawanna ti kinaganetget ti Ama ti Ili  a makikaysa kadagiti amin nga aktibidades ti Piesta, dagiti kaduana iti Komite a da SB Member Vicky Serna  ken SB Jemaima Tan-Yee ken iti kinagaget ti MSWD Officer, Mys. Lydia S. Gazmen  agraman ti  staff-na a mangtarabay kadagiti naituding nga aktibidades  kadaytoy nga aldaw ti Piesta.

Walo a cluster barangays ti Day Care ti nagsasalip. Nagpaay a Hurado da SB Member Dr. Carlito S. Pano, SB Member Vicky Serna ken SB Member Dr. Jemaima Tan-Yee.
Kalpasan ti pakontes, naipakaammo a nangabak ti Cluster 8 (NISTC), 1st Place; Cluster 6- 2nd Place ken Cluster 4- 3rd Place.

Nagpaay nga emcee da Mr. Rudy Ilar, Mr. Ferico Arcebal, Jr.,  Mr. Ronel Solis ken Ms. Ligaya Castillo, agpapada a Day Care Teachers. # (Web In-Action)
 

No comments:

Post a Comment