PANAGSAGANA TI PIESTA TI AGENDA TI FEDERATED FARMERS

Cabugao, Ilocos Sur – Naangay ti Regular Monthly Meeting ti Federated Farmers’  Association ti ili a Cabugao nga idauluan ni Mr. Elmer Guerrero Bromeo ita nga aldaw, Abril 3, 2012 iti Municipal Conference Hall a nagatendaran ti 38 a kamkameng ken tinarabay dagiti pannakabagi ti DA-LGU babaen ken ni   Mrs. Ester P. Aguimbag, Municipal Agriculturist ken kasta met ni Mr. Rogelio Barlolong, Chairman,  Municipal Agriculture and Fishery Council (MAFC).

Nagatendar met  ni SB Member Benedicto M. Savellano, Committee on Agricultural Chairman ti Sangguniang Bayan ket dinayawna ti kinaaktibo dagiti mannalon ken mangngalap. Babaen ti programa ti Gobierno Munisipal iti panangidaulo ni Mayor Edgardo “Ediboy” S. Cobangbang, Jr. kadagiti mannalon ken mangngalap, imbatad ni SBM Savellano  a makikammayet/makitinnulong  met   iti pannakaidanon kadagiti serbisio ken  pagsayaatan  a  maited kadakuada.  

Kaaduan a napagsasaritaan ket ti panagsagana dagiti mannalon ken mangngalap iti umasideg a panagpiesta ti ili a no sadino a ditoy ket maisangrat ti kaaldawanda  inton Abril 21, 2012 ket agmalmalem-rabii  iti naituding nga aktibidadesda.

Napagsasaritaan pay nga ita nga aldaw, Abril 3, 2012 ti maudi a pannakaisubmiter dagiti stubs ti Raffle Tickets a mabola inton Farmers’  Day ti Ragsak Cabugao Festival 2012 iti bulan ti Abril 2012.

Maysa pay a naipangruna a napagpapatangan iti panangisubmiter ti tunggal asosasion ti kasapulan a papeles  iti Bureau of Internal Revenue (BIR) agingga iti Abril 15,  2012   a kas  obligasion ti tunggal rehistrado nga asosasion.

DAGITI NAGKAKADUA A BARANGAY KEN IPABUYADA:
Cluster 1 (Modern Dance) Pug-os, Bato, Nagsantaan, Rizalina, Marga-ay ken Bungro    

Cluster 2 (Folk Dance) Salapasap, Sabang, Namruangan, Salomague, Dardarat, Daclapan, Turod ken Baclig     
Cluster 3 (Instruments) Cael-layan, Sisim, Maradodon, Mango Farmers, Alina-ay, Arnap, Turod-Patac, Carusipan ken Catucdaan.    

Cluster 4 (Gansa/Tadek) Cuantacla, Nagsincaoan, Cacadiran, Lipit, Cuancabal, Sagayaden, Pila, Rizal ken Aragan.