Monday, April 23, 2012

FARMERS & RIC FORUM, NAPNUAN KAIPAPANAN TI RESULTANA

Cabugao, Ilocos Sur – Naaramid ti maikatlo a parte ti panagselebrar ti Farmers’  Day ti pannakaangay ti Farmers and RIC Forum iti malpas-pangaldaw idi Abril 21, 2-12 a no sadino a ditoy ket naggigiddan ti aktibidades babaen ti  lektura, Quiz Bee, Miki Cook Fest (Miki-Lunggay) a tinarawidwidan itoy dagiti pannakabagi ti DA-LGU Cabugao  ken OPAg (Office of Provincial Agriculture Staff/Personnel.

Naluktan ti Forum iti panangidaulo ti kararag ni Mr. Dominador Reynold Sabio, Farmers Federated Vice President  ken inted ni  Federated Farmers President  Elmer Bromeo ti pammasangbay a sarita babaen ti panangkablaawna ti amin a mannalon ken panangidawatna a mataginayon daytoy a tanipkel ken urnosda manipud pay itay panagparadada itay  bigat  agingga a malpas ti akemda iti umuna nga aldaw ti  panagpiesta ti ili.

Binagi met ni Mrs. Ester Aguimbag, Teknisian ti DA-LGU ti nagiyam-ammo kadagiti agsarita, sangaili ken partisipantes kadaytoy a forum.

Nagyaman manen dagiti mannalon ken ti  sibubukel a pederasion ti panangipaay ni Mayor Edgardo “Ediboy” S. Cobangbang, Jr. iti makainspirar a mensahe a nangipeksaanna iti panangdayawna iti  nabunga nga aktibidades dagiti mannalon ken ti akem ti DA a nangtarabay kadakuada. Kuna ti Alkalde a naikkanda ti gundaway nga agserbi ket batangda met ita   ti mangpapintas ti kasasaad dagiti mannalon. Innayon pay  ti Alkalde a ti pannakataginayon ti talek ken pammatida iti Gobierno Munisipal  ket di   agpatingga ti maited a tulong kadakuada a mannalon. Impasagepsep ti Alkalde nga aniaman a sanikua a magun-od  ti Gobierno ken ti  umili, agserbi para iti umili. Aw-awisen  pay ti Alkalde ti  amin a mannalon a para kadakuada ti umay a rabii a panagrambakda. Ken  sapay koma ta dagiti masursuroda kadagitoy a mayadal a teknolohia ket agbanagto iti kabukbukodanda a pagsayaatan nga ag-translate  met  iti pagimbagan iti  ili a Cabugao.

Trinatar ni Mr. Teresito Batin, P4MP Coordinator & Organic Farming Officer ti DA  ti Organic Farming and Agriculture ken naisaruno pay a nag-demonstrar ti produktoda dagiti pannakabagi ti Bayer Crop Science and Technology ken Monsanto  Seed Company. Kalpasanna , naaramid ti Quiz Bee.

Nangpangayed unay ti pannakaipabuya ti Acrobatic Show iti CCP a nangimatangan ti reprep nga umili.


Iti sabali a bangir, naballigi met ti  resulta ti naigannuat a pakontes ti panagluto ti Miki-lunggay. Adda 11 a Cluster Barangays a nagpartisipar iti benneg ti Rural Improvement Club (RIC)  Members and Officers iti Munisipalidad ti Cabugao nga idauluan ni Federated RIC President Grenalyn Amoroso. Nagpaay a Hurado da: Mr. Harold Solis, Ms. Anabelle Ancheta ken Mr. Dexter Benavidez.

Kalpasan a naramanan dagiti Hurado ti luto dagiti nakisalip, naiparabur a nayon a merienda ken  linak-am dagiti umili a nagatendar/nagbuya  ti nasao a forum ken pakontes ti naluto a miki-lunggay. # (Web In-Action) 

No comments:

Post a Comment