Thursday, April 19, 2012

REGIONAL MANGO SYMPOSIUM, NAANGAY DITOY CABUGAO

Cabugao, Ilocos Sur – Maangay ti Regional Mango Symposium babaen iti Department of Agriculture-High Value Commercial Development Program (HVCDP),  Region 1 a dar-ayan dagiti nadumaduma a Mango Growers Association kadagiti probinsia ti Pangasinan, La Union, Ilocos Sur ken Ilocos Norte iti dua nga aldaw mangrugi ita,  Abril 19 agingga iti 20, 2012  iti Cabana Beach Resort Convention Hall, Brgy. Pug-os, Cabugao, Ilocos Sur.
 
Iti Abril 19, 2012, umabot ti 100 nga opisiales ken kameng ti asosasion ti agmangmangga ti dimteng nga agatendar. Naiyam-ammo dagiti delegado babaen ken ni Ms. Kristine P. Gonzales, HVCDP Staff ken nangipaay ni Mayor Edgardo “Ediboy” S. Cobangbang, Jr. iti pammasangbay a mensahe. Kinablaawan ti Alkalde  dagiti amin a partisipantes ken opisiales ti nadumaduma nga asosasion, opisina, NGO’s ken Ahensia a makikammayet iti daytoy dua nga aldaw a symposium.
 
Impeksa ni Mayor Ediboy  ti naan-anay a suporta ti Gobierno Munisipal ti Cabugao iti pannakaidur-as ti industria ti mangga a kas maysa a kangrunaan a produkto a mangitag-ay ti kabibiag dagiti mannalon iti Munisipalidad ken iti sapasap a Rehion Uno.
 
Naglektiur  da Mr. Angel O. Padilla, Regional HVCDP Coordinator ken nangipaay ti rationale ti symposium idinto ta binagi ni Mr. Ricardo Tolentino, President, Federation of  Mango Growers’ Association, Region 1 a bininsabinsa  ti kasasaad ti produksion ti mangga iti agdama, dagiti timmaud a pakaseknan dagiti mannalon ti mangga:  panagpatanor ken panagilako ti produksion iti lokal a merkado.
 
Binagi met ni Mr. Pedro Corpuz, nalatak a mango grower ti La Union nga impadigo dagiti diskartena iti panagballigina nga agmangmangga.
 
Impadanon ni Mr. Ador Sadomiano, Center Chief, DA Research, Batac City ti mensahe ni DA Regional Executive Director Valentino C. Perdido, Ph. D. ket kalikaguman ti opisial ti DA a babaen ti symposium ket makabukelda ti nasamay a solusion dagiti pakaseknan ti industria ti mangga ditoy Rehion Uno.
Iti malem ti Abril 19, 2012, nangipaay  ti mensahe ni SP Member Atty.  Robert Tudayan ti 2nd District Ilocos Sur. Impakaammona ti naan-anay met a suporta ti Hunta Probinsial babaen ti panangidaulo ni Gov. Luis “Chavit Singson ken Vice Gov. DV Savellano iti pannakataming ti pakaseknan ti industria ti mangga, pannakabirok ti solusion ken iti napintas a merkado daytoy a produkto tapno manayonan ti matgedan dagiti mannalon.  
 
Naangay ti open forum babaen ti panang-facilitate ni Mr. Angel O. Padilla tapno maibirokan ti solusion ken alternatibo a programa dagiti pagproblemaan ti panagmangga.   # (Web In-Action)
Mr. Ador Sadomiano, Center Chief, DA Research, Batac City
Mr. Angel O. Padilla, Regional HVCDP Coordinator
Mr. Ricardo Tolentino, President, Federation of  Mango Growers’ Association, Region 1
 Ni Teofilo R. Quintal, Provincial Agriculturist

No comments:

Post a Comment