Monday, April 2, 2012

PALM SUNDAY: NATALNA A NASELEBRARAN

Cabugao, Ilocos Sur – Natalna ken nabunga ti pannakaaramid ti uppat a nagsasaruno a Nasantuan a Misa iti Simbaan Romano Katoliko  a kangrunaan a nagintekan ti umili ti Cabugao gapu iti  pannakaselebrar ti Domingo Ramos (Palm Sunday) idi Abril 1, 2012  a pakauna ti  selebrasion  ti Semana Santa a nakaigameranen   ti  kaugalian, pammati ken kultura ni Ilokano iti Doktrina ti Kristianismo.
 
Gapu iti panagdupudop ti lugan ken  tao iti ruangan ti Simbaan, kabuyog ti pannakaipakat  ti Oplan Summer Vacation (Oplan Sumvac) babaen ti Philippine National Police (PNP) ken ipatungpal ti puersa ti  Municipal Police Station ti Cabugao ken Peacekeeping Force (BPATS) ti Barangay Rizal.
 
Impakaammo da SPO1 Darwin Salarzon  ken SPO2 Deryl  Sonido agpada a kameng ti Municipal Police Station  nga awan ti napasamak nga  madi nga insidente kabayatan ti panagsangpet, panagtalinaed dagiti tao iti uneg ti Simbaan ken panagawidda kalpasan a makimisada.
 
Naragsakan met dagiti naglako ti linaga a silag ken oliba a kaaduan ti taga-San Juan, Ilocos Sur ta nakaaduda  ti naglakuan iti  linagada a sag-P10 ken P20 ti maysa. Naurnos ken naulimek dagiti naggatang ken  iti  iseserrekda iti balay ti pagdaydayawan.
 
Maysa daytoy a pammasingked  iti napintas a “performance”  ti kapolisan ken  pannakapadayawda a kanayon  babaen iti Ama ti Ili, Mayor Edgardo “Ediboy” S. Cobangbang, Jr. iti panangipakitada iti “visibility”  ken pannakaaywan ti  seguridad dagiti umili nangruna iti pagaarimutongan ti tattao. # (Web In-Action)

No comments:

Post a Comment