MAYDA MAKISEMANA DAGITI BAKASIONISTA

Cabugao, Ilocos Sur – Apaman a nangrugi ti bakasion ti opisina iti malpas pangaldaw ti Mierkoles, Abril 4, 2012, magsiturong ti napanan ti kaaduan  a pagbakasionan  ken pagrelak-san a kabuybuyog ti pannakaselebrar ti Semana Santa. Adu ti taga-probinsia ti mapan dumayo iti sabali a disso ken taga metropolis nga umay ditoy probinsia (vice versa). Rasonda a gundawayanda met ti mangkita iti sabali a lugar wenno tourist destination nga agdindinamag ta kayatda met a makita iti aktual ken maka-rikna iti nakallalagip a  padas kadagitoy a lugar.

Ditoy Pug-os, Cabugao, Ilocos Sur, adu ti bakasionista ken sangsangaili a naisar-ong iti panagbuelo ti bakasion ken rugi ti Semana Santa. Maysa ti Pamilia Abenojar (Dr. Zacarias P. Abenojar, Brgy. Kagawad, Brgy. Cabaruan, Urdaneta City, Pangasinan) ti nag-overnight iti Pug-os Beach idi rabii ti Abril 4, 2012. Tent ti inusarda a nagyanan a sangapamilia ken nakipagragsakda kadagiti nag-bonfire a kaduada a bakasionista.

“Very peaceful ditoy, Kuya,” kinuna ni Dr. Zac idi interbiuenmi. “Aktibo ti BPATS (Barangay Tanod) ket napintas ti riknami nga aglang-ay ta secured-kami ken nadalus ken napintas ti iliyo nga nalabsanmi. Dumagaskam’to manen no agawidkami ken umaykaminto maki-Pista, Ok?” 

Uray met dagiti dadduma a Beach Resorts and Hotel ken Cottages. Manggapun a mapunpunno ti turista ken bakasionista.

“Tinawen a  Sabado Gloria ti kaaduan ti umay ditoy, manong,” imbatad ni Mr. Lope Palomares, Jr., Chief Security ti CABANA Hotel and Restaurant. “Fully-booked dagitoy a  pagtarusan. Agduduma ti iteneraria  dagiti umay a bisita. Adu met ti foreigners.”

Iti panagrekurida ti Web In-Action idi malem ti Miyerkules, Abril 4, 2012, adda grupo ti taga-Bangued, Abra a naggapu a  nagpasiar kadagiti beach resorts ti Coastal Barangays ti Cabugao ken napanda idiay NISTC (Tiendaan) nga agbirok ti pangrabii-anda sada agsubli kadagiti beach resorts.

Manamnama nga iti sumaruno nga aldaw ket ad-adu pay ti sumangpet a bisita, balikbayans ken bakasionista gapu iti selebrasion ti Semana Santa ken rugi ti Ragsak Cabugao Festival 2012 iti ngalay ti bulan ti Abril 2012. # (Web In-Action)