Wednesday, April 11, 2012

COMPLETION PROGRAM TI ALTERNATIVE LEARNING SYSTEM, NAARAMID

Cabugao, Ilocos Sur – Naangay ti Completion Program of Accreditation and Equivalency iti Alternative Learning System (ALS)  Mobile Program  iti Elementary and Secondary Level iti masakupan ti dua a barangays:  Brgy. Sabang ken Brgy.  Daclapan ita Abril 11, 2012 iti Brgy. Sabang Multi-purpose Hall a no sadino a ditoy ket nagatendar dagiti nagleppas ti adalna, pannakabagi ti DepEd District, Barangay Officials, sangaili ken nagannak.

Linuktan ni Brgy. Captain Edgardo S. Cobangbang, Sr. ti programa ket kimmablaaw ken pinasangbayna dagiti naitaripnong iti daytoy a programa kasta met  ti  pannakaited ti kastoy a pribilehio kadagiti kalugaranna  iti Barangay Sabang.

Inrepresentaran met  ni Mrs. Estrelita M. Siruno, Principal ti Cabugao North Central School  ni Public Schools District Supervisor Helen V. Siruno a nag-mensahe ken  nang-kompirma kadagiti nagleppas ti adalna.

Kalpasan ti intermission number dagiti A&E Learners, impresenta ni Mr. Warren S. Sumibcay, ALS Mobile Teacher  dagiti nakakompleto a nagadal.


Naisaruno ti sabali nga intermission number dagiti nagleppas ti adal sa naiwaras dagiti Certificate of Completion dagiti 28 a nagleppas ti adalna iti Sekundaria ken 2 met iti benneg ti Elementaria babaen kadagiti opisiales ti DepEd District, Kapitan ti Brgy. Sabang, ken manarawidwid ti ALS.

Impeksa ni Miss Maynel Castillo ti Words of Gratitude kadagiti mangisursuro a nangtarabay kadakuada, kasta met dagiti nagannak ken dagiti opisiales ti Barangay ken  Gobierno Munisipal nga idauluan ni Mayor Edgardo “Ediboy” S. Cobangbang, Jr. iti suportada iti daytoy a programa a mangpabassit no di man mangikkat ti illiteracy problem iti kagimongan.

Pinagyamanan met ni Mr. Nestor de los Santos, Coordinator ti Alternative Learning System (ALS)  ken mangisursuro iti pageskuelaan ti Barangay Arnap ti amin a nakipaset iti panagballigi ti programa nangruna iti LGU-Cabugao nga idauluan ni Mayor Ediboy a mangipapaay ti tulong ken agtultuloy a panangtarabayda kadaytoy a  programa para kadagiti  ubbing ken agtutubo a di nakaragpat  ti nangato nga adal. #  (Web In-Action)



No comments:

Post a Comment