GRAND REUNION TI C.I. BATCH ’79, KALPASAN TI 33 A TAWEN

Cabugao, Ilocos Sur – Nangrugi idi kalman, Abril 19, 2012 ti tallo nga aldaw (Abril 19-21, 2012) a  Grand Reunion and Activities  ti Class 1979 ti Cabugao Institute nga idauluan Ms. Luciamar Santella-Pano.
Naaramid ti Welcome Party iti Abril 19, 2012 idiay Marga-ay Hilltop Farm,  Brgy. Marga-ay, Cabugao, Ilocos Sur. Sakbayna, naguurnong dagiti nagkaklase  iti pagtaengan da SB Member, Dr. & Mrs. Carlito S. Pano iti Barangay Rizal, Cabugao  iti 10 a.m. ken naiwaras dagiti  T-Shirt iti 11 a.m.
Napagsasanguan ti pangngaldaw iti 12:00 ti agmatuon ken naituloy ti aktibidad a napauluan: “Bonding Together-A Celebration of Friendship.”
Ita nga aldaw,  Abril 20, 2012, maaramid ti Nasantuan a Misa iti Victorino Savellano Memorial Hall, Cabugao Institute sa maisaruno ti Motorcade mangrugi iti ili ti San Juan via Sinait sada agrikus iti poblasion ti Cabugao nga  agtungpal iti Barangay Namruangan.
Iti Abril 21, 2012, naaramid  ti masasao a “LUAU PARTY” iti Amytony Beach Resort, Barangay Pug-os, Cabugao, Ilocos Sur a  nakapadayawan dagiti alumni ken mangisursuro. Naiparang  pay dagiti naisagana a pabuya dagiti “Dollar Group” a maibilang a balikbayans, Cabugao Group a nagtalinaed iti Cabugao ken Manila Group a nakabase iti Kamanilaan. Napili ken nakoronaan ni Ms. Imelda Pajarillo a binayabay ni Mr. Elimar Castillo iti dayta a sardam. Kalpasanna, naggrupoda para iti pakalaglagipan a ladawanda a sangka-batch.
Indauluan da Ms. Luciamar Santella-Pano, Ms. Amytony Sunio-Abarquez ken Ms. Jocelyn Gazmen-Sta. Ana dagiti kinaklaseda iti Batch 1979 a  nagtataripnong ken nagragsak   iti dayta nga aldaw ken rabii. # (Web In-Action)