Cabugao, Ilocos Sur – Naan-anayen ti pakabuklan ti Barangay Turod-Patac gapu iti pannakapatakder ti baro a Barangay Hall a pakaimatonan ti Gobierno ti Barangay nga idauluan ni Punong Barangay Edgardo Sonido.Daytoy a pasdek ket naipatakder babaen ti tulong ti Gobierno Munisipal nga idauluan ni Mayor Edgardo “Ediboy” S. Cobangbang, Jr.
Kabayatanna, napasayaat met dagiti kalsada babaen ti pannakakongkretoda babaen ti liderato ti agdama nga administrasion ket nasayud ti pannakairuar dagiti produkto dagiti lumugar ken nasimbeng ti panagdaliasat dagiti umili a mapan ditoy a barangay.
Malaksid kadagitoy a pasilidad ti barangay, agkadinamag pay ti nangato ken agtultuloy a produksion ti hybrid ken certified ti klasena a pagay gapu iti panangsurotda iti kabaruanan a teknolohia.
Iti biang ti lider, nagun-od ti Barangay Turod Patac ti Outstanding Barangay in Agricultural Productivity iti Siglat Awards 2011 ken nominado ita a tawen ni Brgy. Captain Edgardo Sonido iti Gawad Saka, Search in Best Hybrid Rice Farmer, Regional Level, Department of Agriculture, DA-RFU 1, San Fernando City, La Union. # (Web In-Action)
No comments:
Post a Comment