Monday, April 23, 2012

SEARCH FOR CABUGAO LOLA 2012, INAPRESIAR TI UMILI

Cabugao, Ilocos Sur – Natukadan ti dakkel a bannog ken  sakripisio dagiti Senior Citizens a nakipagselebrar iti naituding a kaaldawanda: Social Services Day,  Abril 22, 2012 a panagpiesta ti ili ti Cabugao gapu ta naapresiarda kadaytoy a nagapuananda.

Iti 7:30 a.m.  ti Abril 22, 2012, nagparada ti sibubukel a Pederasion ti Senior Citrizens  a buklen ti 7 a Clustering Barangays nga idauluan dagiti opisialesda,  da OSCA Head Remigio B. Sunico ken Federated Senior Citizens Acting President Bonifacio Somera. Nakipagparada met da Mayor Edgardo “Ediboy” S. Cobangbang, Jr.  ken Vice Mayor Danny Q.  Gazmen agraman dagiti nakipaset a kameng ti Sangguniang Bayan kadaytoy a naindaklan a programa ti nataengan iti piesta.

Iti karabiyan ti Abril 22, 2012, naaramid ti Night Celebration ti Social Services Day a ditoy a nakoronaan ti napili a Cabugao  Lola 2012: Mrs. Marina Acosta, maysa a Kagawad  a taga-Brgy. Rizal, Cabugao, Ilocos Sur ken kandidata ti Cluster 3, (Rizal-Dardarat).
Imbokasion ti impaay ni Dr. Romeo Pira ken pananglukat  a sarita ti impaay  ni SB Member  Dr. Carlito S. Pano, Chairman, Komite, Social Services.
Naaramid ti Farewell March ti Outgoing Cabugao Lola 2011 a ni Mrs. Rosita Serrano ti Barangay Bato.

Inyam-ammo ni Mrs. Lydia S. Gazmen, MSWD Officer dagiti kameng ti Hurado iti pakontes.
Impaay ni Mayor Ediboy ti mensahena ket kinablaawanna ti amin a nagatendar iti dayta a rabii. Dinayawna ti kinatunos ken panagsisinnuporta dagiti kameng ti Senior Citizens. Innayon ti Alkalde a ti panagkaykaysa ken timpuyogda, adu pay ti maaramidanda a tumulong ken makipaset iti okasion ti ili. Kinablaawan pay ti Ama ti ili dagiti  balikbayans a  timmabuno  iti okasion. Inapresiar ken naragsakan ni Mayor Ediboy daytoy a naipakita dagiti nataengan.  
Naaramid ti Pageant Proper ken naipakaammo dagiti nangabak kalpasanna. Naisaruno ti pannakapadayaw  ken pannakabanda  dagiti nangabak.

Nakoronaan ti Cabugao Lola 2012 babaen kada Mrs. Juliet A.  Seguban ken Atty. Romeo Sajor.  Nagpartisipar met dagiti opisiales ti Ahensia ti Gobierno a kas kada PSWD Officer Ferdinand R. Concepcion ken Ms. Edith Castillo, Assist. Provincial Agriculturist a nagisaad ti banda   ken korona iti  innem pay a kandidata a  babaen ti Cabugao Lola 2012 a naikkan met ti pammadayaw.

Iti nasao nga aktibidad, nakitaripnong ken naited met ti parteda a nangpadayaw kadagiti kandidata dagiti kameng ti Sangguniang Bayan nga idauluan  ni Vice Mayor Danny Q. Gazmen, SB Member Vicky Serna,  SB Member Dr. Carlito S. Pano,  SB Member Benedict Savellano,  SB Member Jemaima Tan-Yee a kaduana ni  Dr. Johann Yee a kasimpungalanna, SB Member Josefina S. Vallejo, SB Member Richard Alcid, Ret. Judge Efren S. Ubungen, MSWD Officer Mrs. Lydia S. Gazmen, Municipal Treasurer Mrs. Lourdes Azcueta, Local Civil Registrar Linda Gazmen ken dadduma pay a sangaili ken balikbayans a di nainaganan.

Kalpasan ti intermission number dagiti Clustering Barangays, naserraan ti parambak babaen iti panagyaman a sarita ni Senior Citizen Acting President Boni Somera.

Nagpaay nga emcee da Mrs. Gimena G. Agleam ken Mr. Remigio B. Sunico. # (Web In-Action) 

No comments:

Post a Comment