Monday, April 2, 2012

CORONATION CEREMONIES TI BUNGRO ES NAARAMID IDI ABRIL 1, 2012

Cabugao, Ilocos Sur – Naaramid ti Coronation Rites ti Popularity Contest ti Bungro Elementary School nga idauluan ni Mr. Fidel Z. Sinampaga, Head Teacher 3  ken ti Parents-Teachers Association (PTA) a nangidauluan da King Bendell Tatson ken Queen Alfea Kristenz Suniega  idi malem ti Abril 1, 2012 iti School Auditorium a dinar-ayan dagiti agad-adal, mannursuro, nagannak, opisiales ti barangay ken nasangaili dagiti opisiales ti DepEd Cabugao District kasta met nga imbagian ni SB Member Vicky S. Serna iti Gobierno Munisipal nga idauluan ni Mayor Edgardo “Ediboy” S. Cobangbang, Jr. ken ni Vice Mayor Danny Q. Gazmen.
 
Linukatan ni PTA President Lily  C. Albajeso ti programa. Kalpasan ti iseserrek da Outgoing King Aldrich Giron 1st ken Queen Jhen Camille Sajor 1st , simmangbay met ti Royal Court and Their Entourage.
 
Naikabil dagiti sashes babaen kadagiti nagannak. Kinoronaan da Mr. Rodel P. Suniega ken SBM Vicky S. Serna ni Ari Bendell idinto ta da Mr. Edwin S. Savellano ken SB Member Vicky S. Serna met laeng  ken ni Reyna Alfea Kristenz.
 
Imbagian ni SB Member Vicky S. Serna, Committee on Education Chairperson ni Mayor Ediboy ket napusgan a nangted ti mensahe para iti amin a naitallaong iti nasao a pasamak. Kimmablaaw ken nagyaman iti anep dagiti nagannak ken mangisursuro iti Bungro ES a mangpaadda iti nayon a kasapulan ti eskuela babaen iti naangay a popularity contest. Impeksa met ti Konsehala ti panagtutunosda iti Alkalde ken Bise Mayor ti ili a mangkita iti amin a wagas a pakatulongan kadagiti amin a pageskuelaan iti Munisipalidad.

 
Kalpasan ti koronasion ken pannakaisaad ti Sash, Coronet, Bouquet ken Trophy dagiti Prinsipe ken Prinsesa, naipabuya ti Tribute a nagpartisiparan ti Grade 1 agingga iti Grade 6.
 
Kadua ni Mrs. Julia A. Cayso, Principal ti Cuantacla ES da Mrs. Melvi S. Sajonia, Principal ti Turod ES ken Mrs. Mildred S. Naval, Head Teacher ti Pug-os ES  a nangibagi ken ni Mrs. Helen V. Siruno, Public Schools District Supervisor. Nagatendar met da Mr. Demy Peneyra, Head Teacher ti Catucdaan  ES ken Mr. Genaro Solmerin, Head Teacher, Salapasap ES.
 
Panagyaman ken panangbigbig ti naited a tulong iti sektor-edukasion ti Bungro ES manipud iti Gobierno Munisipal  ti anag ti mensahe da Brgy. Captain James S.  Sera ti Brgy. Marga-ay a kaaduan ti lumugar ditoy ket agpabpabasa iti nasao a pagadalan kasta met ken ni Bungro Brgy. Captain Fermin Sarinas a nangserra ti programa ken nagyaman met iti naballigi a pannakairingpas ti nasao a programa ti pagadalan.
 
Kabayatan ti panagsisina dagiti timmalantan, nairagpin a nayanunsio ti pakaaammo manipud iti eskuela ti Bungro ES kas iti sumaganad: Assessment for Grade 1, May 2-4, 2012; Brigada Eskwela, May 21-25, 2012 ken Hunio 4, 2012, panaglukat ti klase para iti Tawen 2012-2013. # (Web In-Action)


 

No comments:

Post a Comment