CABUGAO, ILOCOS SUR – NAANGAY itoy nga ili ti “blood letting” a nagtinnulongan ti Philippine Red Cross, Ilocos Norte ken Ilocos Sur Chapter.
Iti pannakiuman ‘toy nagsurat ken ni MedTech Grazela Azcueta-Pereyra ti PRC-Ilocos Norte Chapter kinunana: “Mabalin nga ag-blood letting ti maysa a tao maminsan iti tunggal tallo a bulan. Daytoy no nasalun-at ti mangidonar ti darana. Maikkan ti blood donator iti Donor Card a mangipaneknek nga isuna ket nagidonar ti dara. No kasapulanto ti blood donator a nagidonar ti darana mabalinna nga isakada iti PRC blood bank sadino man ditoy pagilian.”
Dinakamat pay ni Apo Pereyra a madi nga agidonar ti darada dagiti nakainum nupay no nausawanda kalpasan ti 24 nga oras mabalinen nga agidonar.
Innayon ni Apo Pereyra a saan a mabalin nga agidonar ti darada dagiti nagpa-tattoo, post operative, agmain-maintenance ti agasda, addaan nakaro a sakit ken maamiris nga umuna ti blood donator no mabalinna iti agidonar wenno saan.
Inlawlawag da Apo Pereyra ken Apo Romel Arciaga, a kameng ken driver, ti PRC-Ilocos Norte, kinunada: “Depende a dara ti kasapulan dagiti um-umay a pasiente no Type A, B, AB ken O. Nupay nalaklaka a sapulen ti Type O ngem ti Type AB. Kaaduan a blood donator ti Type A ken O ti darada.”
Indauluan ni MedTech Edna Orcina, administrator ti PRC-Ilocos Norte Chapter ti gungloda manipud iti Amianan.
KABAYATANNA, sinuportaran ti LGU-Cabugao daytoy a blood letting iti pannangiwardas ni Mayor Edgardo “Ediboy” S. Cobangbang, Jr., ti PNP-Cabugao babaen ken ni Chief of Police William Nerona. #A joe s. somera
No comments:
Post a Comment